-ЦАГДАА НАР ТӨӨРСӨН ХҮҮГ ЖАГСААЛ ХУВЦСАНДАА
ӨЛГИЙДӨН УНТУУЛЖ БАЙЖЭЭ-

Хэлд ороогүй бяцхан хүү Дарь Эхийн автобусны буудалд дээр олны дундаас ээж аавыгаа хайж уйлж байна гэх дуудлага авсан Баянзүрх дүүргийн цагдаагийн хоёрдугаар хэлтсийн жижүүрийн бүрэлдэхүүн хүүхдийг авахаар очиход нүдээ бүлцийтэл уйлсан нэг нас 11 сартай хүү байсан аж. Тэд хүүхдийг цагдаагийн алаг тэргэндээ суулгаж, аргадаж явсаар хэлтэс дээрээ авчирахад хүү ярьж чаддагүй учир аав ээжийнхээ нэрийг тэр ч бүү хэл өөрийнхөө нэрийг ч хэлж мэдэхгүй байж. Хүү анх олдохдоо цэнхэр өнгийн дээл, цэнхэр алаг өмд, бор өнгийн монгол гуталтай байсан гэв.

Гуравдугаар сарын 10-ны өдөр Баянзүрх дүүргийн 21 дүгээр хорооны нутаг дэвсгэрээс 16 цагийн орчимд хүүг олсон бөгөөд хэлтэс дээрээ байлгах хугацаандаа Нийслэлийн цагдаагийн газрын харъяа цагдаагийн хэлтсүүдэд зарлан мэдээлэл хүргэсэн боловч ар гэр нь цагдаагийн байгууллагад дуудлага мэдээлэл өгөөгүй, хаяг нь тодорхойгүй байсан байна. Энэ хугацаанд алба хаагчид хүүг хуурайлж, хооллож ундлан, унтуулж, саатуулсаар орой болтол эцэг эхийн үүргийг орлон гүйцэтгэжээ.

Цагдаагийн алба хаагчид ээлжлэн дэлгүүр гүйж живх авчирч ээлж ээлжээрээ сольж, хүндэрэхэд нь угааж цэвэрлэж гурван удаа живхийг нь сольсон талаараа бидэнд тус дүүргийн дэд ахлагч Ц.Самбууням хэлж байлаа. Мөн цайны газраас хоол авчирч өгөх бүрт их өлссөн байсан хүү жигтэйхэн идэж байгааг хараад алба хаагчид өлсгөхгүйн тулд ээлжлэн амттан, хоол, ундаа, цай авчирч ундаалж байсан аж. Хооллож дуусмагч нойрмоглож буй хүүг хараад тэд цагдаагийн дүрэмт хувцсандаа өлгийдөн бүүвэйлж, гурван удаа унтуулсан гэсэн.

Алба хаагчид хүүгийн эцэг эх, асран хамгаалагчийг олж тогтоохын тулд бүхий л арга хэмжээг авсан боловч олдоогүй учир хүүг оройн 23:30 цагт "Хүүхдийн тусламжийн 108 төв"-д хүлээлгэн өгчээ. Гэтэл эцэг эх нь хүүхдээ алга болсныг нэг өдрийн дараа буюу гуравдугаар сарын 11-ний өдөр мэдэж 20:16 цагт цагдаагийн байгууллагад хандсан байна. Учир нь хүүгийн ээж, аав салсан бөгөөд хүү аавтайгаа байдаг ч "ээж нь аваад явсан биз" хэмээн тоогоогүй орхисон талаараа харамсан ярьжээ.

Төрсөн эцэг эх нь бяцхан хүүгээ үл тоон бүтэн нэг өдөр асууж сураглах ч үгүй байх хугацаанд цагдаагийн алба хаагчид эцэг эхийнх нь үүргийг биелүүлж, хайрлан, хамгаалж, бүтэн өдөржин ээлж дараалан асарч, өвөр дээрээ суулган эрхлүүлсэн болоод ч тэр үү нэг ч удаа уйлаагүй гэж алба хаагчид хэлж байна.

Дээрх төөрсөн хүүг Хүүхэд гэр бүл хөгжлийн газрын харъяа 108 төвд хүлээлгэн өгсөн юм. Энэ талаар бид Баянзүрх дүүргийн гэр бүл, хүүхэд, залуучуудын хөгжлийн хэлтсийн А.Мөнхгэрэлээс тодрууллаа.

-Танай дээр гудамжинд төөрсөн гэх хүүхдийг авчирсан байна. Хүүхэд ирэхдээ биеийн байдал ямар байсан бэ?

-Хүүхэд манай төвийн хамгаалах байранд ирэхдээ эрүүл саруул, ямар нэгэн шархгүй ой арван нэгэн сартай эрэгтэй хүүхэд байсан. Хэлд ороогүй ч ойр зуурын үг хэлж байсан. Ээж аав насны хувьд харьцангуй залуу гэр бүл байсан. Залуус маань хүүхэд төрөөд удаагүй байхад тусдаа амьдардаг болсон. Гэхдээ хүүхдийн ээж аав нь саахалт айлын нэг гудамжинд байдаг хүмүүс юм билээ.

-Хүүхэд алга болох үедээ хэнийдээ байдаг байсан бэ. Яагаад хүүхдээ алга болчихоод байхад мэдэлгүй бүтэн нэг өдөр болж байгаа юм бол?

-Хүүхэд аав дээрээ байдаг байсан юм билээ. Бид хуулийн дагуу хүүхдийн ар гэрт нь очиж нөхцөл байдлын үнэлгээ хийсэн. Тэгэхэд хүүхэд аав эмээтэйгээ хамт амьдардаг. Заримдаа ээж нь хүүгээ нэг хоёр өдөр гэртээ аваад ордог. Алга болсон өдөр аав нь ээж нь аваад орж дээ гэж бодсон байгаа.

-Эцэг эх нь хамгаалах байрнаас хэзээ ирж авсан бэ?

-Гуравдугаар сарын 13-ны өдөр 13 цагт хүүг эцэг эхэд нь хүлээлгэн өгсөн. Ээж аавыг нь ирэхэд хүү эмнэлгийн шинжилгээнд хамрагдсан. Хоол ундтай аюулгүй газар байж байсан. Эцэг эхэд нь бид нарын зүгээс хууль тайлбарлаж өгдөг. Мөн өргөдөл бичүүлж авдаг юм. Түүнчлэн эцэг эхтэй нь гэрээ байгуулдаг. Хэрэв хүүхэд ямар нэгэн хүчирхийлэлд өртсөн шинж тэмдэг илэрвэл эмнэлэг болон цагдаагийн байгууллагатай хамтран шалгалтын ажиллагаа явуулна. Энэ хүүхдийг гэр бүлд нь буцаагаад өгөхийн тулд амьдардаг гэрт нь очиж үнэлгээ хийхэд боломжийн гэж гарсан учраас хүлээлгэн өгсөн байгаа.

-Хүүхэд үл хайхрах хүчирхийлэлд өртсөн тохиолдлоор сард хэдэн хамгаалах байранд ирдэг юм бэ?

-Сард дунджаар 10-15 орчим ирдэг. Гэр бүлийн нөхцөл байдал, эцэг эхийн хайхрамжгүй байдлаас үүдэж хүүхэд үл хайхрах хүчирхийлэлд өртсөн тохиолдол байдаг. Үл хайхрах хүчирхийллээс болж хүүхэд цахим тоглоомонд донтох, гадуур тэнэх, гэмт хэрэгт холбогдох, гэмт хэргийг золиос болох зэрэг маш олон сөрөг үр дагавартай байдаг.

ГЭРЭЛ ЗУРГИЙГ Г.БАЗАРРАГЧАА