Монгол Улсын Үндсэн хуулийн Цэцийн дарга Д.Одбаяр онгоцны үйлчлэгчийн биед хүрсэн гэх асуудлаар БНСУ-д шалгагдаж байгаа. “Эр нэг эндэж, эрэг нэг нурдаг” гэсэн үг бий. Түүний солонгос хүүхний өгзөг илснийг зөвтгөх гэсэнгүй. Яахав, тухайн улсынхаа хуулиар гэмт хэрэг мөн л юм биз. Монголчууд бид ч хөөргөн сагсуу солонгосчуудыг даган хуйларч “галуу дуурайж хэрээ хөлөө хөлдөөх”-ийн үлгэр болж байна. Тал шигээ уужимхан сэтгэл, уудам ухаант миний ард түмний, тэр тусмаа уулын орой харж алсын бараа ширтэж явах монгол төрийн дээдсийн ухааны чагтага улам л хэврэг богино болоод байх шиг санагдах юм. Доржийн Одбаяр бол төрийн зарим эрх мэдэлтэн шиг мөнгө идсэн луйварчин биш. ЖДҮ-чин ч биш. Тэр бол жирийн л нэг монгол аав, ээжээс мэндэлсэн жирийн л монгол хүү. Өөрийн хичээл зүтгэлээр Монгол Улсын дөрөвдэх том албан тушаалтан буюу Үндсэн хуулийн цэцийн дарга болсон ийм л хүн. Тэр бол Монгол Улсдаа хэрэгтэй гэвэл хэрэгтэй том л албан тушаалтан. Тиймээс ч Үндсэн хуулийн цэцийн дээр зөвхөн хөх тэнгэр л байдаг гэх яриа гарсан биз. Солонгосчууд жирийн нэг онгоцны үйлчлэгчээ үнэндээ үнэд орж тэнгэрт тултал өмөөрч байхад Монгол гэдэг улс төрөө төлөөлсөн Одбаяраа үндсэндээ шороотой хутган хаяж байна.

Одбаярт хандаж буй БНСУ-ын талын зарим үйлдэл арай л дэндүү увайгүй байна. Тус улсад гэмт хэрэгт сэжигтнээр татахдаа шүүхээс гэмт хэрэг үйлдсэн гэж үзэх нөхцөл байдал үүссэн тохиолдолд баривчлах шийдвэрийг гаргадаг. Уг нь мэдүүлгээ өөрөө очиж өгнө гэвэл заавал баривчлах шаардлага байдаггүй. Одбаяр Индонезиэс ирэхдээ Солонгосоор дайралгүй эх орондоо хүрээд ирж болох л байсан. Тэгэхэд түүнийг хүн чанар, ёс жудаг нь чангааж Солонгосын онгоц буудлын цагдаад очоод биеэ тушаачихаж чадлаа. Тэр бол Монгол улсдаа, монгол эх орондоо хайртай хүү байна. Эр хүнд ийм нэг жудаг байх сайхан. Мэргэжлийн сумогийн 68 дахь их аварга Асашёорю Дагвадорж цахим хуудсандаа “Цагдаа нар онгоцны үйлчлэгч бүсгүйн мөрөнд хүрсэн залууг авч явах гэхэд нь өмөөрч хэрэлдсэн юм байна шүү. Манай хүн мужик хүн чанар гаргасан юм биш үү” гэж Одбаярын талаар бичиж. Монголчуудын унаган ааль араншинд “Унасныг түлх” гэсэн гүн ухаантан Ницшегийн харгис зарчим огт байгаагүй. Харин ч хазайхад нь түшиж, хальтрахад нь дэмнэж яваарай гэж ерөөдөг сүүн цагаан сэтгэлтэй юм, миний ард түмэн. Тэгсэн өнөө нэг л биш ээ. Нэгнийгээ жаахан хазайнгуут түлхэж унагаад нүүр нүдгүй дэвсэлдэг их муухай авир араншинтай болцгоолоо.

Одбаяр маань нэг бүдэрлээ. Бүдэрсэн дээр нь Монгол Улс түүнийг иргэнээ гэж үзэлгүй, огт тоохгүй байгаа нь л дэндүү гунигтай. Монгол Улс тусгаар улс мөн л юм бол иргэнээ гэх учиртай. Тэгэхэд харин ч унасан дээр нь улам бахаа хангаж шуугьцгааж байна. Гэмт хэрэгтэн, сэжигтний гэм буруутай эсэх нь тогтоогдоогүй байхад нэр болон нүүрийг нуух заалт тухайн улсын хуульд байдаг. Ил гаргавал энэ нь хүний эрхийн хуулийг хамгийн ихээр зөрчиж байгаа үйлдэл болдог ч манай улсын иргэнд энэ хууль, дүрэм харамсалтай нь үйлчилсэнгүй. Түүнийг дэлхийгээр нэг зарлан тунхаглав. Тус улсын хэвлэл мэдээллийн хэрэгсэл бүрээр түүнийг гарган хэлэлцүүлэг хийж, топ арван сэдвийн нэг болтол нь сэвэв. Тэгэхдээ бүр хуулиа зөрчиж шүү. Манайхны ихэнх нь “хуультай улс иргэнээ хамгаалж байна” гэх утга бүхий зүйл ярьж байгаа ч тус улс манай улсын иргэний эрхийг хамгаалах ч мөн үүрэгтэй. Энэ хэрэгт хөндлөнгийн нөлөө ч байхыг үгүйсгэж боломгүй. Ялангуяа Монгол Улсад “КАЛ” буюу "Korean Air” нь хамгийн ашигтай Улаанбаатар-Инчоны чиглэл, монополи эрхээ өрсөлдөгч “Ашиана эйрланс”-т алдаж эхлээд байгаа. КАЛ бол БНСУ-ын төрийн байгууллагад ч нөлөөлөх чадвартай том корпораци. Солонгосын Шударга өрсөлдөөний газарт КАЛ-ыг монополи эрхээ ашиглан хэт их үнэтэй нислэг үйлдэж байгаа талаар гомдол гаргаж байсан хэдий ч тэрхүү гомдлыг шийдвэрлэж өгөөгүй. Мөн албан ёсоор хариу өгөлгүй дарж байсан түүхтэй. Д.Одбаярын хийсэн үйлдлийг зөв, буруу эсэхийг бид “шүүх” эрхгүй ч хүний нутагт эрх нь зөрчигдөж байгаа Монгол Улсын иргэн гэдэг талаас нь харах хэрэгтэй. Жирийн биднээс ялгаатай нь Д.Одбаяр Үндсэн хуулийн цэцийн дарга гэх албан тушаалтай. Харин Монгол Улсын иргэний үнэмлэх дээр Доржийн Одбаяр. Бидэн шиг л Д.Одбаяр Монгол Улсын иргэн. Бид монголчуудаа өмөөрөх, хамгаалах сэтгэлгээтэй баймаар. Нөгөөтэйгүүр хамт явсан А гэгч чухам хэн болох, тэр хүнийг яагаад зарлахгүй байгаа, мөн тухайн онгоцонд КАЛ-ийн удирдлагууд хамт нисэж байсан тухай мэдээлэл огт цацагдахгүй байгаа нь БНСУ-ын тал хэт нэг талыг баримталсан мэт сэтгэгдэл төрүүлж байна.

Солонгосын хуулиар гэмт хэрэгтэн газар дээрээ, үйлдэл дээрээ баригдсан ч нүүр царайг нь сонин хэвлэлээр гаргах эрхгүй байдаг. Хүний хувийн эрх чөлөөнд халдлаа гэсэн үндэслэлээр буруутгагдах үндэслэлтэй. Тэгэхэд Д.Одбаярын мэдүүлэг өгч байгаа дүрс Солонгосын телевизийн “А суваг”-аар нь гарч байсан. Монголчууд үүнийг хараад яс цусны тасархай нэгнээ ёстой нэг үгийн муухайгаар харааж, үйлдлийн муухайгаар доромжилж байна. Энэ нь угтаа өөрөө хүчирхийлэл шүү дээ. Бэлгийн хүчирхийлэлд хүртэл сэтгэл санааны амгалан байдал алдагдуулсан гэсэн зүйл заалт байгаа. Монголчууд бид өнөөдөр ямар өчүүхэн дорд сэтгэлгээтэй болчихсны горыг Одбаяр амсах ёсгүй. Тэр бол Монгол Улсын иргэн хүн. Тэр солонгос хүний эрхийг зөрчсөн байж болно. Харин түүний эрхийг зөрчих эрх Солонгос ч бай, Монгол ч бай аль ч улс оронд байж болохгүй үзэгдэл. Үндсэн хуулийн өмнө хүн бүр адил тэгш эрхтэй. Өнөөдөр бид үндэс угсаа нэгтнээ ингэж доромжилж улан доороо гишгэлчихээд маргааш хүн чанар ярьж явна гэвэл тэрэн шиг үлгэр байхгүй. “Хүн чанар морь биш, түүнийг унаад хол явахгүй” гэдэг адгийн амьтдад монголчууд ясны дургүй байдаг даа. Одбаярыг золионд гаргалаа гээд Монгол Улсын нэр төр өсөөд саарал жагсаалтаас гарчихын дайны хачин юм бодвол тэрэн шиг лөөлөө байхгүй дээ, амиа бодсон аминч арчаагүй монголчууд минь!