-Түүнийг огцруулах асуудлаар Ерөнхийлөгч Х.Баттулга, УИХ-ын дарга Г.Занданшатар нарт албан шаардлага хүргүүлжээ-

ХЭҮК-ын гишүүн П.Оюунчимэгийн хууль бус үйлдлийн талаар “Эм Эс Пи Ди” ХХК-ийн Борлуулалтын албаны дарга Э.Баатарсүх, өмгөөлөгч Г.Бат-Эрдэнэ нар мэдээлэл хийлээ. Тодруулбал, Хүний эрхийн үндэсний комиссын гишүүн Пүрэвийн Оюунчимэгийн талаарх маш ноцтой баримтат нэвтрүүлэг “LIVETV.MN” сайтад тавигдаад удаагүй байгаа. Уг бичлэгт тэрбээр “Ер нь бол би дандаа л хууль хүчний байгууллагынхантай харьцдаг. Энэ авгай намайг шоронд хийчихнэ дээ гэдгийг мэдэхгүй байна тээ. Би хийвэл зүгээр шууд асуудал алга. Би утасдаад л наадахаа барь гээд, ийм юм боллоо гэхэд энэн шиг хурдан юм яг үнэнийг хэлэхэд байхгүй” гэжээ.

Өмгөөлөгч Г.Бат-Эрдэнэ: “Хүний эрхийн үндэсний комиссыг анх байгуулагдсан цагаас нь хойш ажилласан хүн бусдыг шоронд хийлгэж чадахаар агуулгатай үг хэлж байгаа нь хүний эрхийг хамгаалах бус эсрэгээр зөрчигч, албан тушаалын эрх мэдлээ урвуулан ашиглагч этгээд болохыг нотлон харуулсан. Монгол Улсад хуулиар олгогдсон эрх, эрх чөлөө нь зөрчигдсөн иргэд хуулийн байгууллагад хандаад үр дүнд хүрэхгүй байгаа нь энэ мэтийн хүмүүс хүний эрхийг уландаа гишгэсэн хууль бус үйлдэл хийж байгаатай холбоотой” гэв.

Төрийн өндөр албан тушаалын эрх мэдлээ урвуулан ашиглаж буй П.Оюунчимэгийн бүрэн эрхийн хугацаа 2019 оны хоёрдугаар сарын 06-ны өдөр дууссан байна. Иймд тус компанийн зүгээс бүрэн эрхийн хугацаа нь дуусаад есөн сар болж байгаа Пүрэвийн Оюунчимэгийг нэн даруй албан тушаалаас нь огцруулах асуудлаар Монгол Улсын Ерөнхийлөгч Х.Баттулга, УИХ-ын дарга Г.Занданшатар нарт албан шаардлага хүргүүлжээ.