Монгол зоны сайн таних Буриадын алдарт бөх, ОХУ-ын гавъяат тамирчин, дэлхий, европ, Азийн аварга Борис Будаевын хүү Зоригто бэлтгэл хийж байх үедээ зуурдаар нас баржээ. Түүнийг бэлтгэлийн дараа зүрх нь зогссон гэж Улаан-Үдийн телевизээр мэдээлсэн байна. Буриадын домогт бөхийн хүү Зоригто дөнгөж 37 насандаа ийнхүү таалал төгсчээ. Аав шигээ чөлөөт бөхөөр хичээллэж, Улаан-Үдийн аварга болж байсан ч гэмтлийн улмаас зодог тайлсан Зоригто хөл бөмбөг тоглодог байжээ.

Буриадын алдарт бөх Борис Будаевын хувьд энэ жил 62 настай бөгөөд түүний нэрэмжит тэмцээнийг Улаан-Үдэд зохион явуулдаг уламжлал тогтоод 27 жил болж байна. Одоогоос 11 жилийн өмнө буюу 2008 онд Пермь хотод болсон ахмад бөхчүүдийн ДАШТ-д 51 настайдаа барилдахдаа 17 кг жин хасч оролцоод 76 кг-ын жинд түрүүлж байсан гэхээр ямар хаттай ясны бөх болох нь ойлгомжтой биз ээ. Тэрбээр нэгэн ярилцлагандаа “Цорын ганц харамсдаг зүйл гэвэл олимпийн аварга болохыг мөрөөдөхгүй яав даа. Би чинь тамирчин байхдаа дэлхийн аварга болохыг мөрөөдөн зорьсондоо хүрсэн хүн. Харин олимпийн аварга болохыг хэзээ ч мөрөөдөж байсангүй. Тэгээд ч болоогүй” хэмээн ярьсан байдаг. Мөн “Хүний амьдралд хамгийн чухал нь гэр бүл шүү дээ. Гэр бүл, үр хүүхдүүдийнхөө төлөө л бид амьдардаг” гэж ярьж, гэр бүлийн үнэ цэнэ хайр халамжийг дурсан суусан алдарт бөхөд эмгэнэл илэрхийлье.

Түүний хүүтэй салах ёс гүйцэтгэх ёслол маргааш болох юм байна.