Авлигатай тэмцэх газрын Хяналт шалгалт, дүн шинжилгээний хэлтсээс нийтийн албан тушаалтнуудын давхар ажил эрхлэлтийн байдал, үндсэн ажлаас гадуур хуулиар зөвшөөрснөөс өөр ажил үүрэг гүйцэтгэж байгаа эсэх, хууль бусаар орлого олсон эсэх, хоёр буюу түүнээс дээш байгууллагад нийгмийн даатгалын шимтгэл төлөгдсөн байдалд хяналт шалгалт явуулжээ. Шалгалтаар нийтийн албан тушаалтнуудын давхар ажил эрхлэлтийн байдал, үндсэн ажлаас гадуур хуулиар зөвшөөрснөөс өөр ажил үүрэг гүйцэтгэж байгаа эсэх, хууль бусаар орлого олсон эсэх, хоёр буюу түүнээс дээш байгууллагад нийгмийн даатгалын шимтгэл төлөгдсөн зөрчлүүд илэрчээ. Энэ талаар АТГ-ын Мэдүүлгийн бүрдүүлэлт, дүн шинжилгээний албаны дарга Ц.Цэцэгдэлгэрэхээс тодрууллаа.

-Төрийн албан хаагчдыг давхар ажил хийж байгааг шалгахад нэлээд зөрчил илэрсэн гэж байна. Энэ талаар мэдээлэл өгөхгүй юу?

-АТГ-аас хуульд заасан чиг үүргийн хүрээнд нийтийн албан тушаалтнууд давхар ажил эрхэлж байна уу гэдэг дээр холбогдох хяналт шалгалтыг явуулсан. Шалгалтаар нэр бүхий таван яамны нийтийн албан тушаалтнууд үндсэн ажлын хажуугаар давхар ажиллаж эрхэлж байсан нь тогтоогдсон. Хуульд зааснаар нийтийн албан тушаалтанд зөвшөөрсөн давхар ажиллахаар бол багшлах, эрдэм шинжилгээний ажил хийх, тухайн байгууллагын удирдлагын шийдвэрээр давхар ажил эрхэлж болдог. Гэтэл нийтийн албан тушаалтнууд сүүлийн үед өндөр настны тэтгэвэр тогтоолгох, тэтгэврээ үндэслэлгүйгээр нэмэгдүүлэх, аж ахуйн нэгж байгууллага дээр давхар нийгмийн даатгал шимтгэл төлүүлсэн байна. Энэ нь нийгмийн даатгалын тухай хуулийн дагуу зөрчил. Иймээс тухайн ажил олгогч хуулийн этгээд харьяа дүүргийн нийгмийн даатгалын газарт тайлан мэдээгээ үнэн зөв гаргаж өгсөн байна уу. Мөн нийтийн албан тушаалтан буюу төрийн албан хаагч давхар шимтгэл төлсөн байна уу гэдгийг шалгуулахаар харьяа дүүргийн нийгмийн даатгалын хэлтэст шилжүүлсэн байгаа. Мөн ажлаас чөлөөлөгдөж хөдөлмөрийн гэрээ дуусчихсан хүн дээр нийгмийн даатгалын шимтгэлийг давхар төлсөн байна. Энэ нь төсвийн хөрөнгийг зориулалтын бусаар ашигласан. Иймээс холбогдох яаманд албан бичиг хүргүүлсэн.

-Ажлаас халагдсан хүний нийгмийн даатгалыг таван жил төлсөн байгууллага нь ямар байгууллага байсан бэ. Хуулиар ямар арга хэмжээ авах вэ?

-Нийгмийн даатгалын хуулийн дагуу зөрчил гэж үзнэ. Ажил олгогчийн зүгээс ажил хөдөлмөр эрхлээгүй хүнд давхар шимтгэл олгож байгаа нь бас зөрчил. Иймээс авлигын зөрчил гаргасан гэж үзэж санхүүч, нягтлан бодогч нарт хариуцлага тооцно.

-Шалгалт хэдий хүртэл үргэлжлэх вэ. Хичнээн байгууллагыг хамруулах вэ?

-Сая нэр бүхий таван яамыг шалгасан. Одоо энэ шалгалт үргэлжилж явагдана. Хууль зөрчиж, нийтийн албан тушаалтан давхар ажил эрхэлж байгаа тохиолдолд хариуцлага тооцоод явна.

-НИТХ-ын төлөөлөгчид улиралд 15 сая төгрөгийн урамшууллыг авдаг. Төлөөлөгчдийн зарим нь давхар албан тушаал хашиж байгаа. Эдгээр хүмүүсийг шалгах уу?

-Төрийн албаны тухай хуулинд зааснаар улс төрийн албан тушаалтанд сонгогдсон албан тушаалтан бүрэн эрхийн хугацаанд төрийн жинхэнэ албан тушаалд томилогдохыг хориглосон байгаа. Дан ганц нийслэлд биш орон нутагт ч ийм зөрчил байна. АТГ төрийн албаны зөвлөлтэй хамтарч шалгалт хийнэ. Мөн зөрчил гаргаж байгаа хүмүүст хариуцлага тооцож, арга хэмжээ авна.