Зон олны намын ерөнхий нарийн бичгийн дарга Э.Одбаяр, тус намын гишүүн Б.Нарангэрэл нар шахмал түлштэй холбоотой асуудлаар өнөөдөр мэдээлэл хийлээ.

Зон олны намын ерөнхий нарийн бичгийн дарга Э.Одбаяр: “2010 оны эхэн үеэс арав гаруй аж ахуйн нэгж шахмал түлш үйлдвэрлэх туршилт хийж, үйлдвэрээ байгуулсан байдаг. Энэ үед Засгийн газар үйл ажиллагааг дэмжиж ажиллана гэсэн боловч өнөөдрийг хүртэл үүд хаалгыг нь лацдан үйл ажиллагаа эрхлэх зөвшөөрлийг өгөхгүй байна. Нийслэлийн иргэдэд шахмал түлш нийлүүлэх болсон цагаас дээрх арав гаруй нэгж үйл ажиллагаа явуулах хүлээлттэй байсан ч дан ганц “Таван толгой түлш” ХК-ийг дэмжин ажиллаж байгаа нь монополь үүсгэж байна. “Таван толгой түлш ХК-тай ижил үзүүлэлттэй шахуу хувийн аж ахуй нэгж хүртэл хөрөнгөө оруулсан мөртлөө хаалгаа лацдуулж, үйл ажиллагаа явуулах боломжгүй байдалтай байна. Өнөөдөр шахмал түлшийг зөв, буруу гэдэг ч юм уу сайн муу гэдэг талаас нь ярих зорилготой байсангүй. Эхний асуудал нь ард иргэдэд шахмал түлшийг хангалттай хүргэж чадахгүй байна. Шахмал түлшний хомсдолд ороод байна. Шахмал түлшний хэрэгцээ шаардлага их байгаа үед бусад аж ахуйн нэгжүүдийг ажиллуулах сонирхол Засгийн газарт байхгүй байна. Засгийн газарт ямар шаардлагыг хүргүүлж байгаа вэ гэхээр эдгээр ААН-үүдийн үйл ажиллагааг хэвийн болгож, шахмал түлшний эрэлт нийлүүлэлтийг тэнцвэржүүлэх. Нэг ёсондоо ААН-уудын үйл ажиллагааг хэвийн явуулах нөхцлийг бүрдүүлж өгөхийг хүсэж байна” гэв.

Мөн тус намын зүгээс шахмал түлш үйлдвэрлэгч арав гаруй аж ахуйн нэгжийг дэмжин ажиллахыг Засгийн газраас хүсч, шаардлага хүргүүлж буйгаа мэдэгдлээ.