УИХ дахь МАН-ын бүлгийн дарга Д.Тогтохсүрэн нь 2020 оны нэгдүгээр сарын 17-18 нд Австрали улсын Сидней хотын казинод тоглож явсан талаарх мэдээлэл хэвлэлүүдэд цацагдаж эхэллээ. Үүнээс өмнө Үндсэн хуулийн цэцийн дарга онгоцонд өгзөг илсэн асуудал дэлхий нийтийнхний чихийг дэлдийлгэж, нүдийг бүлтийлгэв. Тэгтэл Монголын дипломатчийн 70 кг хар тамхины хэрэг Европыг доргиов. Монгол Улсын Элчин сайдууд эх орондоо ирээд авилгын хэргээр саатуулагдав. Элчин сайд асны охин Хятадын хар тамхины бүлгийнхэнтэй хамт баригдаж, хоригдов. Энэ бүхэнд Монгол Улсын гадаад нэр хүнд унасаар байна.

Төрд ажиллаж байгаа хэн боловч гадаадад казино тоглож болохгүй, хэрвээ тоглосон тохиолдолд ажлаас нь чөлөөлөх журмыг Засгийн газраас гаргасан. Хэрвээ МАН-ын бүлгийн дарга гадаадад айлчлалаар яьж байхдаа казинод тоглосон нь нотлогдвол ажлаасаа халагдах нь тодорхой болно. Аливаа нэг улстөрч ч бай, иргэн ч бай гадаад улс оронд явахдаа улс эх орныхоо нэрийг л өндөрт өргөхөө байг гэхэд хайрлаж хямгадаж явах хэрэгтэйг дээрх хар хэргүүд гэрчилнэ. Өнөөдөр дэлхий гэдэг бөөрөнхий биш нэг хавтгай болсон. Тэнд нэг үхрийн эвэр доргиход энд мянган үхрийн эвэр доргино шүү дээ. Эх орондоо баригдаж, хилийн хоригт орж байгаа Элчин сайдад харь орныхон итгэж хамтарч ажиллах нь юу л бол. Улс орны ч бай, хувь иргэний ч бай ямар ч өнцгөөс нь харсан итгэл алдсан хүнд итгэл өвөрлөж хамтарна гэхэд хэн ч итгэхгүй нь тодорхой.

Казино тоглох гэдэг асуудал Монголын төрд шургалсан эрхмүүдийн ёстой нэг хорхойг нь хүргэдэг буруу зуршил. Ж.Мөнхбат гэдэг гишүүнийг гэхэд “Болор цом” наадамд түрүүлсэн яруу найрагч гэхээс нь илүүтэй Солонгост казинод тоглож хэдэн тэрбум төгрөг алдсан гэдгээр сайн мэдэх жишээний. Уг нь энэ казиног нь Монгол Улсад хууль хүчин төгөлдөр байгуулчихмаар байгаа юм. Тэгээд яахав, хуулийнхаа хүрээнд мөнгөтэй улс нь тоглоно л биз. Харин тэр төрийн эрх мэдэлтнүүдийг тоглох гэж донтвол ёстой нэг чангалаад, бүр шорон оронд илгээдэг хуультай болчих хэрэгтэй. Дэлхий нэг л хавтгай болсныг анзаараагүй дээдэс маань хилийн дээс алхуут л туйлын эрх чөлөөтэй мэт загнаж, хөлөөрөө толгой, толгойгоороо хөл хийснээр заримдаа ч нялх хүүхдээс долоон дор юм юманд орооцолдох юм даа. Монголын төр ийм хачин дархлаагүй болчихсон юм уу, хаашаа юм.

Парламентын эрх баригч намын бүлгийн дарга, ҮХЦ-ийн дарга, Элчин сайд гэдэг чинь хариуцлагатай чухал үүрэг хүлээсэн том л албан тушаалууд баймаар юм. Тэгэхэд л Монголынхоо нэрийг бодсон ч юм байхгүй, өөрсдийнхөө нэрийг хайрласан ч юм байхгүй дандаа нэг хууль бус юманд орооцолдоно гэдэг мөн ч гунигтай үйл юм даа. Энэ ч хууль бусаар олсон эрх ямба, буруу гараар орж ирсэн эд баялагтай л холбоотой байдаг биз дээ. Тиймээс л эдэнд бүх зүйл сонин биш, аливаа сайхан бүхнийг шороотой хутгаж явах сонирхолтой болчихсон байдаг биз ээ.