ЗГХЭГ-ын дарга Л.Оюун-Эрдэнэ өнөөдөр төрийн ордонд сэтгүүлчдэд мэдээлэл өглөө.

“Өмнө нь казино тоглох асуудал манайд нэлээд бугширчихсан, УИХ-ын гишүүд, төрийн албан хаагч бараг тоглох ёстой мэт үздэг, Элчин сайдын яамдууд нь хүртэл мэддэг байсан. Харин одоо үүнийг хүлээн зөвшөөрдөггүй нийгмийн уур амьсгалын сэтгэл зүй бүрдэж байгаад миний хувьд туйлын их баяртай байна”

-Казино тоглосон нь тогтоогдсон төрийн албан хаагчид хариуцлага тооцох, ажлаас нь чөлөөлөх хүртэл арга хэмжээ авахаар төрийн албан хаагчийн ёс зүйн дүрэмд тусгасан. Казинотой холбогдсон УИХ-ын гишүүдэд ямар хариуцлага оногдуулах вэ ?

-Засгийн газрын 33 дугаар тогтоолоор төрийн албаны тухай хуулийн 40.2, төрийн албаны зөвлөлийн саналыг үндэслэн 2019 оны нэгдүгээр сарын 23-нд дүрэм батлагдсан байгаа. Энэ дүрэмд өөрчлөлт оруулаад,

• 3.1.4.г. гадаадад зорчихдоо мөрийтэй тоглоом (казино) тоглож, энэ төрлийн үйлчилгээний газраар үйлчлүүлэхгүй байх гэдэг дэд заалтыг Засгийн газрын

2019 оны 122 дугаар тогтоолоор нэмсэн.

Энэ тогтоол төрийн захиргаа болон төрийн үйлчилгээний албан тушаалтанд үйлчилнэ гэж ойлгож болно. Дипломат албатай холбоотой асуудал бол төрийн тусгай алба. Энэ нь Засгийн газрын 2019 оны долоодугаар сарын 3-ны өдрийн 272 дугаар тогтоолоор батлагдсан байдаг. Дипломат ажилтны сахилгын дүрэм дотор казино тоглох хориотой байгаа. Гэхдээ шууд халах үндэслэл байхгүй. Сануулах, уучлал гуйлгах үндэслэл байдаг. Хэвлэл мэдээлэл болон иргэддээ баярлалаа гэж хэлмээр байна. Өмнө нь казино тоглох асуудлууд манайд нэлээд бугширчихсан, ямар нэг зураг дэлгэгдлээ гэхэд нийгэм нь огт тоохоо больчихсон, энийг УИХ-ын гишүүд, төрийн албан хаагч бараг тоглох ёстой мэт үздэг, олуулаа казино тоглодог нь тодорхой, тэрийг нь Элчин сайдын яамдууд нь хүртэл мэддэг байсан. Энэ дүрэм батлагдсанаас хойш үндсэндээ дөрвөөс таван сарын хугацаа л өнгөрч байна шүү дээ. Харин одоо үүнийг хүлээн зөвшөөрдөггүй нийгмийн уур амьсгалын сэтгэл зүй бүрдэж байгаад миний хувьд туйлын их баяртай байна. Их хурлын гишүүнд энэ дүрэм үйлчлэх үү гэдэг асуудал яригдаж байна. Монгол Улсын Их хурлын гишүүны ёс зүйн дүрэм бол УИХ-ын тогтоол дээр батлагдаж үйлчлэхээс өөрөөр Засгийн газар УИХ-ын гишүүний халдашгүй бүрэн эрхэд халдах боломж байхгүй.

Төрийн албан хаагчид халагдаад байхад үлгэр жишээ байх ёстой

Асуудлыг харахад хоёр намын бүлгийн дарга хоёулаа байгаа. Төрийн албан хаагчийн сахилгатай холбоотой асуудлыг удаа дараа ярьдаг Д.Лүндээжанцан гишүүн хүртэл өөрөө холбогдсон асуудал үүслээ. УИХ-ын гишүүний ёс зүйн дүрмийг хуульчлан батлахаас өөр аргагүй болж байгааг нийгмийн сэтгэл зүй харуулж байна. Энэ нөхцөл байдлыг туйлын сайн ойлгосон байх гэж бодож байна. Үүнийг Засгийн газраас өргөн барьсан байгаа. Хууль зүйн байнгын хорооноос ёс зүйн дүрэмтэй холбоотой асуудлыг давхар өргөн барьсан. Төрийн албан хаагчид халагдаад байхад үлгэр жишээ байх ёстой. УИХ-ын гишүүд хариуцлагаас гадна үлддэг энэ жишигт үүгээр цэг тавьж, дуусгах ёстой.

Мөрийтэй тогтосон нь тогтоогдсон тохиолдолд Элчин сайдыг нэн

яаралтай эгүүлэн татна

Өнөөдрийн байдлаар авч хэрэгжүүлж чадах зүйл бол Элчин сайдтай холбоотой асуудал байгаа юм. Энэ асуудлын талаар Гадаад хэргийн сайдтай өчигдөр холбогдсон. Төрийн албан хаагчийн ёс зүйн дүрэмд мөрийтэй тоглоомын газраар үйлчлүүлэхгүй байх гэж тусгасан. Тэгэхээр ороод гарсныг үйлчлүүлсэн гэж үзэх үү үгүй юу гэдэг маргаантай асуудал үүсэж байна. Бидний хувьд Засгийн газрын харьяа Цагдаагийн ерөнхий газар, Тагнуулын ерөнхий газрын холбогдох албаны хүмүүсд энэ асуудлыг тогтоох үүрэг, чиглэлийг өгсөн. Хэрэв тогтоогдсон тохиолдолд Элчин сайдыг Засгийн газрын хуралдаанаар оруулж, нэн яаралтай эгүүлэн татах арга хэмжээ авах боломжтой. Цаашид УИХ-ын гишүүдийн бүрэн эрх гэж орхих биш хамтдаа хариуцлага хүлээлгэдэг байх чиглэл рүү сэтгүүлч та бүхнийг Засгийн газартай хамтарч ажиллана гэж бодож байна” гэлээ.