ДЭМБ-ын өгсөн мэдээллээр коронавирусын халдварын тохиолдол одоогийн байдлаар 887, нас баралт 26 болоод байна. Монгол Улс БНХАУ-тай хиллэдэг учир уг вирусын халдвар манай улсад орж ирэх эрсдэл өндөр байгааг холбогдох албаныхан хэлж байгаа юм. Үүнтэй холбогдуулан Эрүүл мэндийн сайд Д.Сарангэрэлээс зарим зүйлийг тодрууллаа.

Д.Сарангэрэл:“Коронавирусын халдвар нууц үетэй гэдэг нь тодорхой болчихсон”

-Коронавирусын тархалт цаг тутамд нэмэгдэж байна. Манай улсын хувьд урьдчилан сэргийлэх ямар ажлуудыг хийж байна вэ?

-Хятад улсын хувьд хамгийн сүүлийн мэдээгээр, батлагдсан оношоор 887 хүн уг вирусээр халдварлаж, 26 хүн нас барсан, зургаан улс оронд бүртгэгдсэн гэдэг мэдээлэл байна. Манай улсын иргэдийн зүгээс хил, гаалиа хаах хүсэлтэй байгаагаа илэрхийлсэн. Энэ вирус нь ахуйн болон агаар дуслын замаар хүнд халдаж байгаа учраас хил гаалиа хаалаа гээд үр дүн байхгүй гэж ДЭМБ мэдэгдэж байна. Иймд ДЭМБ-ын зүгээс улс орнуудад хил гаалиа хаах зөвлөмжийг хүргүүлэхгүй байгаа гэдгийг мөн хэлсэн. Хамгийн гол нь ард иргэддээ сэрэмжлүүлэх хэрэгтэйг сануулж байна. Монгол Улс 21 төрлийн ханиад томууны вирусыг илрүүлдэг лабораторитой. Улаанбаатар хот, Орхон аймаг, Дархан хот болон Дорнод аймагт ханиад томууны вирус илрүүлдэг бүсчилсэн лаборатори бий. Тэдгээр лаборитариор вирус нь гарч ирэхгүй бол коронавирусын сэжиглэл гэж үзнэ. Энэ өвчин нууц үетэй гэдэг нь тодорхой болчихсон.

-Энэ вирусын эсрэг эмчилгээ батлагдаагүй байгаа гэж эх сурвалжууд хэлж байгаа шүү дээ?

- Энэ вирусын эсрэг эмчилгээг дэлхий батлаагүй байна. Зургаан төрлийн коронавирус байгаа. Энэ бол долоо дахь шинэ вирус учир аль ч улс оронд эмчилгээ гаргаагүй байгаа. Энэ вирус нь анхан шатандаа ханиад томууны шинж тэмдэгтэй учраас тэр шинж тэмдгийн эмчилгээ одоогоор хийгдэж байгаа. Амьтны гаралтай гэж байгаа боловч яг юунаас үүссэн нь бас батлагдаагүй. Хил хаах асуудал үр дүнгүй. Бүх улс орон ДЭМБ-ын зөвлөмжөөр явж байгаа. Коронавирусын талаарх мэдээллийг өдөр бүр ард иргэдэд хүргэнэ. Ялангуяа Монгол Улс Хятад улстай хиллэдэг учир вирус орж ирэх магадлал өндөр бий. Гэхдээ Монгол Улсад одоогоор бүртгэгдээгүй байна. Сэжигтэй тохиолдлууд их олон оронд байгаа боловч батлагдаагүй байна. Хүнээс хүнд халдварладаг нь тодорхой болсон. ДЭМБ болон Хятад улсын зүгээс “Энэ өвчний талаар мэдэхгүй зүйл их байна, дүр зураг, цаашдын хандлагыг тодорхойлох боломжгүй байгаа” гэдэг тайлбарыг хийж байна. Хятад улс энэ өвчний талаарх мэдээллийг огт нуухгүй байгаад ДЭМБ талархаж байгаа. Коронавирус нь нууц үетэй учир хил гаалиар тогтоон барих ямар ч боломжгүй юм.

ХЯТАД УЛС ЭНЭ ВИРУСЫГ ГАРГАХГҮЙ, ТОГТООН БАРИХАД АНХААРЧ

АЖИЛЛАХ АМЛАЛТ ӨГЧЭЭ

- Нууц үедээ хилээр ороод ирчихсэн байх боломжтой юм биш үү?

- Гахай, шувууны томуутай адил нууц үетэй байгаа. Тийм учраас эмнэлгийн тусламж үйлчилгээг үзүүлэхэд анхаарах хэрэгтэй. Уушгины хатгалгааны үеийн томуугийн цар тархалтын үед хэрхэн яаж ажилладаг вэ, тэр дэглэмээрээ ажилла гэсэн зөвлөмжийг ДЭМБ-аас аваад хэрэгжүүлж байна. Одоогоор нөхцөл байдал яаж өрнөхийг хэн ч хэлж мэдэхгүй байна. Гэхдээ Хятад улсын зүгээс энэ вирусыг аль болох гаргахгүй, тогтоон барих талаар анхаарч ажиллана гэдэг амлалтыг өгсөн.

ХӨСҮТ-д 50 ортой тусгаарлах өрөөг бэлэн байдалд оруулсан

- Дүүрэг, хороодын эмнэлгүүдийн бэлэн байдал ямар байгаа бол?

- Томуугийн цар тахлын үеийн бэлтгэл ажлыг олон улсын байгууллагуудтай хоёр жилийн турш яриад бэлэн байдлаа хангачихсан байхгүй юу. Эм тариа бэлэн. 21 вирусээ илрүүлнэ. Хэрвээ 21 төрлийн вирус илрэхгүй мөртлөө халуураад тодорхойгүй шинж тэмдэг илэрвэл ХӨСҮТ-д тусгаарлана. Тус эмнэлэгт 50 ортой тусгаарлах өрөөг бэлэн байдалд оруулчихсан байна. Бусад эмнэлгүүдээр оношлохгүй гэсэн үг биш. Бусад эмнэлэгт шинжилгээгээ авч, тусгаарлах боломжтой.

- БНХАУ-аас ирсэн орчуулагч эмэгтэйг ХӨСҮТ-д тусгаарласан гэсэн?

- Тэр хүний хувьд ихэнх үзүүлэлтээрээ үгүйсгэгдсэн. Галт тэргэнд ээжийнх нь толгой өвдсөн, хүү нь халуурсан тохиолдол гарсан. ХӨСҮТ-д авчирч тусгаарласан зүйл байхгүй. Ээж, хүү хоёр Замын-Үүд рүү орж ирсэн байсныг буцаасан. Дээр нь дахиад хоёр хятад иргэн халуурсан тохиолдол гарсан. Эдгээр иргэдийг Эрээн хотоос шууд буцаасан. Монгол Улс руу орж ирээгүй. Коронавирус Монголд орж ирвэл бид юуг ч нуухгүй. Орж ирэх магадлал өндөр учир бэлтгэл ажлыг сайн хангаж ажиллах хэрэгтэй байна.

- Энэ вирус үхлийн аюултай юу?

-ДЭМБ-ын зүгээс энэ талаар хэлэхдээ “Үхлийн аюултай гэж шууд хэлэхэд төвөгтэй. Яагаад гэвэл нас барсан тохиолдлууд ихэнх нь суурь өвчтэй өндөр настай хүмүүс байсан. Уг вирусыг ханиад, томуу гэж бодоод эмнэлэгт хугацаа алдаж хандсан. Үүнийг үхлийн аюултай, явц нь хурдан гэж тодорхойлоход хэцүү байна” гэж мэдэгдсэн. Халдварт өвчний талаарх мэдээлэл тухайн өдрөөр өөрчлөгдөж байгаа учраас өдөр бүр 11 цагаас явцын мэдээллийг олон нийтэд хүргэж ажиллана.