Ухань хотын нүдний эмч Ли Вэн Лянь коронавирусын халдварын улмаас пүрэв гарагийн 02 цаг 58 минутад нас барсан байна. Тэрээр Ухань хотын төв эмнэлэгт ажиллаж байх үедээ уг өвчний халдварыг авсан байж болзошгүй аж. Нүдний эмч Линь 2019 оны 12 дугаар сарын 30-ны өдөр өөрийн хамт сурч байсан эмч нарт групп чатаар аюултай өвчин тархаж болзошгүй тул хамгаалалтын хувцас өмсөж, өвчтөнүүдтэй харилцахыг анхааруулж байжээ. Тэрээр 12 сарын 31-ний өдөр БНХАУ-д 2003 онд гарч байсан Сарс өвчний халдвартай төстэй шинж бүхий өвчтөнүүд эмнэлэгт ирсэн тухай олон нийтэд анхааруулан хятадын сошиаль сүлжээ болох Вэйбод мэдээллэсэн байна. Гэтэл 2020 оны нэгдүгээр сарын нэгний өдөр орон нутгийн цагдаагийн газраас хий цуурхал тараасан 8 иргэд арга хэмжээ авсан тухай мэдээллэжээ. Ухань хотын цагдаагийн байгууллагаас дээрх 8 иргэнийг цуурхалаа даруй зогсоохыг шаардаад дахин олон нийтэд ийм төрлийн мэдээлэл тараавал хорих хүртэл арга хэмжээ авахыг сануулан анхааруулсан санамжид Ли эмч болон бусад 7 иргэнийг гарын үсэг зуруулан, хурууны хээг нь даруулан авсан байна. Тухайн үед нүдний эмч Ли Вэн Ляний анхааруулгыг эрт мэдэж, сэргийлсэн бол 636 хүн амь насаа алдахгүй байх ч боломж байсан гэж тус улсын иргэд бичиж эхэлжээ. БНХАУ-д өнөөдрийн байдлаар 31,161 хүн коронавирусын халдвар авсан бөгөөд эдгээр хүмүүстэй ойр харилцаанд орсон хүний тоо 300 мянга хол давсан статистик үзүүлэлт гарчээ.

Нүдний эмч нас барсанд иргэд эмгэнэл илэрхийлж эхэллээ

Пүрэв гарагаас эхлэн хятадын сошиаль сүлжээ болох Вейбод орон нутгийн эрх баригчдыг буруутган, Ли Вэн Лянь эмчийн анхааруулгыг авах ёстой байсан, бид үзэл бодлоо илэрхийлэх эрх чөлөөг шаардаж байна хэмээн шүүмжилж эхэлсэн байна. Гэвч Ли Вэн Лянь эмчийн тухай бичсэн иргэдийн харуусал, орон нутгийн эрх баригчдыг шүмжилсэн шүүмж баасан гарагийн өглөө нийгмийн сүлжээнээс устсан байна. Өнөөдөр ч гэсэн түүнийг хятадын ард түмний төлөө, тэдний эрүүл мэндийн төлөө нийгмийн сүлжээнд хамгийн түрүүнд анхааруулга тавьсных нь төлөө хятадын иргэд, олон нийт санан дурссаар байгаагаа илэрхийлсээр байгаа юм. ВВС мэдээллийн агентлаг нүдний эмч Ли Вэн Ляний нас барсан цаг хугацаа эргэлзээ төрүүлж буй талаар мэдээлэл бичсэн байна. Коронавирусын улмаас нас барсан хүмүүсийн ихэнх нь 60 орчим насны өөр өвчний шинж тэмдэг хавсарсан хүмүүс дийлэнх нь байгаа аж. Харин Ли Вэн Ляний хувьд 34 настай байсан бөгөөд түүний өвчтөний түүх нь одоогоор нууц байгаа юм байна.