Хятад улсад шинэ төрлийн коронавирусын халдвараар нас барсан хүний тоо 2003 онд дэгдэж байсан SARS-ыг хэдийнээ давлаа. Шинэ төрлийн вирусын халдвараар одоогоор 813 хүн нас барж, 37214 хүн өвчлөөд байгаа бөгөөд энэ тоо цаг, минутаар өөрчлөгдөж байна.

Коронавирусын халдварын голомт болсон Ухань хотод эмч, сувилагч гээд эмнэлгийн бүхий л ажилчид шаргуу ажиллаж байна. Дараах зургуудаас тэд хэрхэн нүүрний шарх, ядралтаа үл тоон ажиллаж байгааг харж болно.

Ухань хотын эмнэлгүүдэд ажиллаж байгаа эмч, ажилчдын зураг нийгмийн сүлжээнд өргөн тархжээ. Тэд өөрсдийнхөө эрүүл мэнд, амь насыг золиослон зөвхөн өвчтөнүүдэд анхаарал хандуулан ажиллаж байгааг dailymail онцолсон байна.

Орон нутгийн хэвлэлээр Хубэй мужийн Ухань хотод эмнэлгийн ажилчид хэдэн арван цагийн турш хөл дээрээ тасралтгүй зогсон ажиллаж буй талаар мэдээлж байгаа юм.

Ажилчид ээлж солигдохоос өмнө эмнэлгийн сандал болон шалан дээр түр унтаж, нойр авч байгаа бөгөөд ядарч, туйлдаж байгаагаа илэрхийлжээ. Нөхцөл байдлаас шалтгаалан туйлын завгүй байгаа учраас, хоол идэх, тэр ч байтугай бие засах цаг, зав гарахгүй байгаа талаар мөн хэлсэн байна.

Түүнчлэн, тэд коронавирусын халдвараас урьдчилан сэргийлэхийн тулд нүүрний хаалт бүхий хамгаалалтын хүнд тоног хэрэгсэл зүүх ёстой болдог. Үүнээс шалтгаалан тэдний нүүрний арьс зулгарч, биенд нь цэврүү үүсэж, шархалжээ.

Гэрэл зурагт харуулснаар нягт бэхэлсэн хаалт нь арьсанд гүн шархлаа, жижиг гэмтлийг үүсгэсэн байгааг харж болох юм.

Одоогоор Хятад улсын тус бүс нутагт 60 сая орчим хүн хөл хорионд байгаа юм.

Эх сурвалж: DAILYMAIL.CO.UK

Ц.Анударь