Коронавирусын халдлагын аюул нүүрлэж, Монголыг тэр чигт нь түргэн авхуулаад байна. Энэ аюулыг нэвтрүүлэхгүй гэсэндээ гурван замын тээврээ хаахад хүрч, иргэдээ дэмий сэлгүүцэхгүй байхыг анхааруулж эхлээд удсан. Сар шинийн баяртай давхсан нь олны хөл хөдөлгөөнд зохих хэмжээгээр нөлөөлсөн. Өвчний халдвар тархсан улс орноос ирсэн хүмүүсийг зохих журмын дагуу шалгаж, шаардлагатай тохиолдолд шинжилгээний хариу гартал тусгаарлах арга хэмжээ авч байгаа. Энэ хүнд нөхцөл байдалд ЭМЯ-ыхан, эмч, эмнэлгийн ажилтнууд нойр хоолгүй хичээл зүтгэл гарган ажиллаж байгааг Монгол даяараа сайшааж байна. Өнөөдрийн байдлаар нийт 302 хүнийг зөвхөн коронавирустай холбоотойгоор ажиглалтад авснаа ЭМЯ-наас мэдээлсэн. Хавдар тархсан газар орноос ирсэн, мөн зарим иргэн халуурч ирсэн тохиолдолд бусдаас тусгаарлаж, өвчний нууц үеийг өнгөртөл хөл хорио тогтоох нь зүйн хэрэг. Шинэ төрлийн коронавирусын халдварын үед онцгой нөхцөлийн үеийн бэлэн байдлыг шалгах зорилгоор ЭМЯ-ны холбогдох мэргэжилтнүүд Цэргийн төв эмнэлгийн үйл ажиллагаатай энэ сарын 12-нд танилцсан. Тус эмнэлэг халдвараас сэргийлэх хяналтыг сайжруулах чиглэлээр орох гарах бүх хаалган дээр хөтөч, харуул ажиллуулж, иргэд, үйлчлүүлэгчдэд амны хаалт зүүлгэх, гар ариутгах, биеийн халуун үзэх зэрэг хяналтыг тогтмолжуулан ажиллаж байгааг онцолж байв. Түүнчлэн нөхцөл байдал хүндэрвэл тус эмнэлгийн есөн давхар байрыг бүрэн чөлөөлөх, 500 ор бэлдэж, 300 гаруй эмч, эмнэлгийн мэргэжилтэн бэлэн байдалд ажиллуулах боломжтой талаар судалсан байна. Яаралтай нөхцөл байдалд ийн ажиллахад асуудалгүй болсон гэдгээ мэдэгдэж байв. Гэтэл 2-3 хоногийн өмнөөс сошл ертөнцөөр зарим нэг анхаарал татмаар мэдээ цацагдаж эхлэх нь тэр.

Тухайлбал, Онгоцноос буугаад шууд тусгаарлах байранд хүргэгдэж ирсэн нэг иргэн “Оройн 20 цагаас хойш шингэн зүйл уусангүй. Энд ус байгаа ч аягагүй болохоор аргагүй байна. Аяга нэхтэл өөрсдөө зохицуул гэлээ. Ахуйн зүйлсээ бэлтгэж чадалгүй шууд ирсэн хүн яалтай билээ. Энэ ямар сонин тусгаарлалт вэ” гэсэн мессежийг цахим ертөнцөөр тараасан. Хүмүүс их шейрлэсэн байсан л даа. Арай ч үгүй байлгүй. Бас нэг “салхилагч” биз гэж бодоод өнгөрсөн юм. Гэтэл үгүй ажээ. Өчигдөр Япон улсаас Монгол руу ирсэн агаарын тээврийн нислэгээр 260 орчим хүн эх орондоо иржээ.

Эх сурвалжийн мэдээлснээр үүнээс 30-40 орчим хүнийг тусгаарласан байна. Бусад зорчигчдын хувьд ямар нэгэн байдлаар тусгаарлагдаагүй гэв. Харин тэр тусгаарлагдсан хүмүүсийн нөхцөл байдал ямар байна гээч. Цэргийн госпитальд тусгаарлагдаад байгаа эдгээр хүмүүсийг 4-7-гоор нь хувааж тасагт оруулсан байна. Тэднийг хоорондоо зэрэгцүүлэн эгнүүлсэн орон дээр байршуулжээ. Нэгэнт нисэхээс шууд ирсэн болохоор ачаа тээшээ хамт авчирч. Зурган дээрээс харахад тусгаарлах бус, бараг бөөгнүүлсэн мэт санагдана. Угаалтуурын хажууд тавьсан хувинтай усан дээр нэг шанага харагдана. Түүгээр усаа хутгаад жорлонгийн өрөөндөө хийж, ариун цэврээ хангах юм гэнэ. Бас төмөр аяга таваг, халбага, сэрээ тавьж өгчээ. Энэ мэтчилэн бодит байдал ямар байгааг гэрэл зурагнаас харж болно. Газар дээр нь очиж сурвалжлах зөвшөөрлийг хүсэхэд “Тусгаарлалт хийсэн газар юу гэж нэвтрүүлэх юм. Тусгаарлалт гэдэг чинь тусдаа байлгахыг л хэлнэ биз дээ” гэсэн хариу өгсөн. Тусгаарлаж болноо, гэхдээ...