Сүүлийн үед анхаарал татаад байгаа сэдвүүд бий. Тухайлбал, Төрийн сангийн мөнгөөр гадаадын их дээд сургуульд суралцах гэж боловсролын сангаас зээл авсан 1860 оюутнаас 179 хүн авсан зээлээ төлөөгүй сураггүй алга болсны зээлийн үлдэгдэл 4.5 сая ам.доллар. Зээлээ төлөөгүй хүмүүсийн дотор төрд байгаа улс төрчдийн хүүхдүүд байна.

Мөн жилдээ 1-2 их наяд төгрөгийн цэвэр ашигтай ажилласан эхэлсэн “Эрдэнэс Тавантолгой”-г, 209 жил ашиглах нөөцтэй энэ уурхайг зөвхөн нэг жилийн ашгийнх нь үнээр буюу нэг тэрбум ам.доллароор зарах гэж улайраад байгаа хоёр гурван улс төрчийн увайгүй үйлдэл гээд анхаарал татсан асуудлууд ар араасаа хөвөрч байна. Үүнийг үзэж, сонсоод тэсгэл алдсан УИХ-ын экс гишүүн, ЭМ-ийн сайд асан Л.Гүндалай үзэл бодлоо ийн илэрхийлж байна.

УИХ-ын гишүүн асан Л.Гүндалай: “Боловсролын сургалтын сан гэж онц сурлагатай, үнэхээр цаашдаа сурч чадах хүүхдүүдийг, Монголд хэрэгтэй байгаа мэргэжлээр сургах зориулалттай сан юм. Харамсалтай нь, энэ санг манай нөхдүүд буруу хэрэглэж, бас л “нохойн зам”-аар оруулсан байна. Дарга нар өөрсдөө, тэдний хамаатан садангийн үр хүүхдүүд, танил тал нь явсан байх юм. Миний хувьд ийм сургалтын сан байдгийг мэддэг байсан. Гэхдээ би өөрөө болон миний ах дүү нар нэг ч удаа энэ санг ашиглаж үзээгүй. Одоо эргээд харахад энэ сургалтын санг арай хэтэрхий дээрэмдэж, цөлмөж, баллаж хаясан байна. Түүндээ ичихгүй байгаа нь арай хэтэрхий санагдаж байгаа учраас би саналаа хэлье гэж бодсон юм. Сургалтын сан бол хүүхдүүд оюутнуудад зориулагдсан, эргэлтийн хөрөнгө шиг эргүүлж ашигладаг зүйл. Гэтэл энэ санг ашиглаад зугтаачихсан, төлбөрөө төлөхгүй байгаа баячууд байна. Тэдэнд хандаж хэлмээр байна. Ялангуяа УИХ-ын гишүүд, албан тушаалтнуудад хандаж хэлье. Бас хуучин гишүүд, сайд дарга нарын хүүхдүүд ч орсон байх юм. Та нар ичиж амьдраач ээ. Мөнгөө төлөөч ээ. Энэ Сургалтын санг ашиглаад мөнгөө төлөөгүй хүмүүсийг УИХ-д битгий нэр дэвшүүлээрэй, Хүрэлсүх ээ. Дээр нь нэмээд эдгээр хүмүүсийг битгий сонгоорой гэж ард түмэндээ хэлмээр байна. Жишээлбэл, миний мэдэж таньдгаас Ц.Нямдорж хүүхдэдээ 90 гаруй сая төгрөгийн сургалтын зээл авч өгсөн мөртлөө мөнгөө төлөөгүй байх юм. Уучлаарай, Ц.Нямдорж оо, чи одоо мөнгөө төлөөч ээ. Арай хэтэрч байна. Хүүгийнхээ сургалтын төлбөрийг төл.

Тавантолгойн 30 хувийг зарна гэдэг бол хүний өмч болгож байгаа хэрэг

Тавантолгойн IPO буюу Тавантолгойн 30 хувийг зарна гээд байна. Тавантолгойн 30 хувийг зарна гэдэг бол хүний өмч болгож байгаа хэрэг шүү дээ. Таван тэрбум ам.доллар байна уу, нэг тэрбум ам.доллар байна уу хамаагүй, зарахаар чинь тэр 30 хувийн ногдол ашгийг худалдаж авсан хүмүүс нь л авна шүү дээ. Хувьцаа эзэмшигч нь л авна. Монголын ард түмэнд ямар ч хамаагүй болно. Тэрбайтугай багцаар нь авсан хүн тус компанийн бодлогыг тодорхойлох хэмжээнд очно шүү дээ. Ингэж ард түмний өмчийг үрэн таран хийж болохгүй ээ. Монголын ард түмний өмч хөрөнгийг зарж яах гээд байгаа юм бэ. Бүх хувьчлал, бүх IPO чинь дандаа “Нохойн зам”-аар орсныг мартаа юу. Бүх үнэ цэнтэй үйлдвэр, ААН, банкууд, лицензээ гадна дотны нөхдүүдэд хээл хахууль аваад өгчихсөн шүү дээ. Одоо болимоор юм. Монголын ард түмнийг дээрэлхэж, доромжилж ханахгүй юм. Ямар ард түмэн гэхээр ингэж дээрэлхүүлж, хамаг юмыг нь зарж үрэн таран хийж байхад хараад сууж байдаг юм бэ. Үнэхээр харамсалтай байна. Монголын ард түмний бүх олигтой, өнгөтэй бүхнийг зараад, хуваагаад авчихлаа. Улс хамгийн муу менежер гээд л эхэлдэг байхгүй юу, наадуул чинь. Хяналт шалгалтаа сайн хийх юм бол улсын юмыг идэж чадахгүй. Тэр АТГ нь, Аудит нь сайн ажиллах юм бол идэж чадахгүй ээ. Хариуцлага тооцож, барьж хорьдог бол зарж чадахгүй шүү дээ. “Мөнгө мөртэй” гэж ярьдаг биз дээ. Хаашаа юунд шилжүүлээд яаж аваад байна гэдгийг нь тогтоогоод хяналт шалгалтыг нь сайн хийгээд тохирсон хууль дүрмээ гаргах юм бол ингэж даврахгүй. Авлигыг илрүүлсэн хүнд 10-20 хувийн ашгийг нь өгнө гээд хэлчих юм бол, тийм хуультай болчихвол хүмүүс илрүүлээд эхэлнэ. Өнгөтэй өөдтэй бүх юмыг нь зараад дуусгалаа. Жишээ нь, “Говь” ХК, ХААН банк, “НИК” ХК, “Спирт бал бурам” ХК гээд тоочоод байвал зөндөө. Уул уурхай гээд бүх зүйлийг нь зарлаа, харийнханд өглөө. Энэ ард түмэндээ ядаж Тавантолгойг нь үлдээгээч. IPO гээд л байх юм. Initial public offering гэдэг юм л даа. Тэр чинь зүгээр бирж дээр зарна л гэсэн үг. Бирж дээр олигтой үнэ хүрэхгүй бол үнэ нь уначихна. Тэгэхээр хямдхан авна гэсэн үг. Үнийг нь унагааж байгаад ч болсон хямдхан авна шүү дээ, тэд нар. Ингэж ёстой болохгүй ээ. Ард түмнийг битгий доромжил” гэжээ.