НЭМГ-ын Анхан шатны тусламж үйлчилгээ хариуцсан ахлах мэргэжилтэн Д.Ганцэцэг мэдээлэл өглөө.

“Бидний гол зорилго бол коронавирусын халдварыг олон нийтийн дунд тархаахгүй байх юм. Үүнийг ард иргэд маань ойлгохгүй “Биднийг хориглолоо, би гарах эрхтэй, ажилдаа ормоор байна, би Монгол Улсын эрх чөлөөтэй иргэн” гэх мэт байдлаар асуудалд хандаад байна”

-ХЭДХЭН ХҮН ХАРИУЦЛАГА АЛДАХАД ОЛОН НИЙТИЙН ДУНД ӨВЧИН ТАРХАХ АЮУЛ ОЙРХОН БАЙНА-

-Нийслэлийн хэмжээнд хичнээн иргэн тусгаарлалттай холбоотой гэрийн хяналтад байгаа вэ?

-Нийслэлийн эрүүл мэндийн газраас гуравдугаар сарын 24-ний өдрөөс эхлэн гадаад орноос ирсэн, тусгаарлах байрнаас гарсан иргэдийг гэрээр ажиглах ажлыг зохион байгуулан ажиллаж байна. Өнөөдрийн байдлаар 2605 хүн нийслэлийн хэмжээнд хянагдана гэсэн тоо ирсэн. Үүний дагуу хяналтын ажлыг хийж байна. Одоогоор 1741 хүн хяналтад хамрагдаж, 1185 хүнийг хянаж байна. Харамсалтай нь 537 хүн хяналтаас гарсан. Өнөөдрийн байдлаар олдоогүй 13 хүн байна. Дүүргийн болон өрх, тосгоны эрүүл мэндийн төвүүд дээр хяналтын үйл ажиллагааг зохион байгуулж, иргэн болгоны халууныг хэмжин эрүүл мэндийн асуумжийг авч байна. Энэхүү хяналтыг явуулахад иргэдийн өөрсдийн ухамсар, хариуцлага хамгийн чухал байгаа юм. Тухайлбал, 13 хүний хаяг олдохгүй байна гэдэг нь тусгаарлах байранд байхдаа иргэд худлаа утас, хаяг өгсөнтэй холбоотой. Түүнчлэн өрхийн эрүүл мэндийн төвүүд утсаар зөвлөгөө өгөх үед уурлах, эсэргүүцэх тохиолдлууд гарсаар байна. Тусгаарлах байрнаас гарч, өрхийн эрүүл мэндийн төвийн хяналтад орох үед иргэдэд гэртээ тусгаарлалтын дэглэм, журмыг хэрхэн барих ёстой талаар зөвлөмжийг өгсөөр байтал гэртээ хүмүүс цуглуулах, хорионд байх хугацаандаа гадагшаа гарах, эмч нарын үгийг үл тоох, нэг хаяг дээрээ тогтвортой байхгүй байх хандлага маш их гарч байна. Бидний гол зорилго бол коронавирусын халдварыг олон нийтийн дунд тархаахгүй байх явдал. Үүнийг ард иргэд ойлгохгүй “Биднийг хориглолоо, би гарах эрхтэй, ажилдаа ормоор байна, би Монгол Улсын эрх чөлөөтэй иргэн” гэх мэт байдлаар асуудалд хандаад байна. Улс оронд онцгой нөхцөл байдал үүссэн байгааг ойлгох хэрэгтэй. Гэхдээ массаараа ийм байна уу гэвэл үгүй. Дийлэнх иргэд ухамсартай байгаа. Манай орон шиг хүн ам цөөнтэй улсад хэдхэн хүн сахилга, хариуцлага алдахад энэ өвчин олон нийтийн дунд тархах аюул ойрхон байгааг ойлгож, ухамсарлая.

Хяналтын үйл ажиллагаанд хороо хэсгийн ахлагч нар болон хөршүүдийн оролцоо туйлын чухал байгаа. Өөрөөр хэлбэл, иргэд харилцан шаардлага тавьдаг баймаар байна.

-13 иргэний тухайд гэртээ байхгүй байгаа гэсэн үг үү?

-Эдгээр хүмүүс тусгаарлах байрнаас гарсан хүмүүс. Тусгаарлах байранд хянагдаж гарсных нь дараа эргээд гэрээр хяналт тавих гэхээр хаяг дээрээ байхгүй байгаа юм. Зарим нь байхгүй болчихсон хаяг өгсөн байх жишээтэй. Зарим иргэний өгсөн утасны дугаар ашиглалтад байхгүй байна. Зориудаар утасны дугаараа сольсон иргэд ч байна. Гэрийн хаяг дээрээ байхгүй байгаа иргэдийг цагдаагийн байгууллага болон дүүргүүдийн штабт мэдэгдэж, хайх ажлыг эхлүүлсэн. Өдөрт хаягийн зөрчилтэй 10-13 тохиолдол бүртгэгдэж байна. Тухайн хүн хаана явж байгаа нь тодорхойгүй байх нь аюул, эрсдлийг нэмэгдүүлнэ.

ЗӨВЛӨМЖИЙГ ДАГАХГҮЙ БАЙГАА, ГЭРИЙН ТУСГААРЛАЛТЫН ГОРИМЫГ АЛДАЖ БАЙГАА ХҮМҮҮСТ ХАРИУЦЛАГА ТООЦНО

- Гэрээр хяналтад байхдаа зөрчил гаргасан иргэдэд хариуцлага тооцсон уу?

-Тусгаарлах байрнаас гарч байгаа хүмүүст албан ёсны зөвлөмжийг нь өгөөд баталгааны маягт дээр гарын үсэг зуруулаад гаргаж байгаа. Тус маягтад “Тусгаарлах горимыг зөрчсөн тохиолдолд Зөрчлийн тухай хууль, Гамшгийн тухай хууль, Эрүүгийн тухай хуулиар тодорхой хариуцлагыг хүлээлгэж, торгуулийн болон хорих арга хэмжээ авах”-ыг тодорхой зааж өгсөн байдаг.

“Гэтэл иргэд зөрчил гаргасны дараа “Надад маягт танилцуулаагүй” гэдэг. Торгуулийн арга хэмжээ оногдуулах гэхээр “Та нарыг шүүхэд өгнө” гэх жишээтэй”

Өнөөдрийн байдлаар гэрээр тусгаарлагдаж байгаа иргэдийг торгосон мэдээлэл байхгүй байна. Гэрээр хяналтад байх үедээ гэртээ хүн цуглуулж, архидан согтуурсан нэг тохиолдол гарсан. Түүнийг өрхийн эмч илрүүлэн мэдээлсэн. Гэтэл тэр эмчийг эргээд шүүхэд өгнө гэсэн. Тухайн зөрчил гаргасан иргэнд 150 мянган төгрөгийн торгуулийн хуудсыг олгосон боловч одоог хүртэл төлөөгүй. Дүүргийн штабуудад ажиллах түр журам гарсан. Уг журмаар тухайн хяналтыг зөвхөн эрүүл мэндийн байгууллага бус дүүргийн цагдаа, мэргэжлийн хяналтын байгууллага, хороо, улаан загалмайн нийгэмлэг хэрхэн хамтран ажиллах талаар заалтууд тусгагдсан. Үүний дагуу дүүргүүд ажиллаж эхэлсэн. Цаашид гэрийн нөхцөлд байгаа иргэдийг хянах ажлаа улам сайжруулна. Зөвлөмжийг дагахгүй байгаа, гэрийн тусгаарлалтын горимыг алдаж байгаа хүмүүст хариуцлага тооцно. Цагдаагийн байгууллага болон мэргэжлийн хяналтын байгууллага тодорхой хууль, дүрмийн дагуу арга хэмжээ авна. Хяналтын ажил улам сайжирна гэдэгт найдаж байна. Хамгийн чухал зүйл иргэдийн өөрсдийнх нь ухамсар гэдгийг давтан хэлье.