Дарханы замын бүтээн байгуулалтын ажлыг өнгөрсөн оны зургаадугаар сарын 17-нд эхлүүлсэн. Улаанбаатар-Дархан чиглэлийн замыг хурдан хугацаанд ашиглалтад оруулахын тулд тав хувааж, таван компанид тендер зарласан байдаг.

Нэгдүгээр багц. Баруун аймгууд руу явах уулзвараас Хар модотын даваа хүртэл 37.2 км авто зам.

Хоёрдугаар багц. Хар модотын даваанаас өргөн хүртэл 30 км авто зам.

Гуравдугаар багц. Урьханаас Сүмбэр хүртэл.

Дөрөвдүгээр багц. Сүмбэрийн уулзвараас, Цайдамын хөндийг хүртэл 45 км авто зам.

Тавдугаар багц. Цайдамын хөндийгөөс Дархан хүртэл 30.5 км авто зам байх юм.

Гэвч өнөөдрийг хүртэл “Улаанбаатар-Дархан” чиглэлийн 224 км авто зам ашиглалт ороогүй. Овоолсон шороо, чулуутай замаар жолооч, тээвэрчид зорчсоор л байна.

САЙДЫН ХООСОН АМЛАЛТ ҮРГЭЛЖИЛСЭЭР...

Улаанбаатар-Дархан чиглэлийн зам ингэж “там” болоод жилийн нүүр үзлээ. ЗТХ-ийн сайд Б.Энх-Амгалан “2019 оны арваннэгдүгээр сард Дарханы зам ашиглалтад орчихно” хэмээн ам бардам хэлж байсан цаг саяхан. Салбарын сайдын хэлсэн хугацаа хэдийнэ өнгөрөөд зургаан сарын нүүр үзэж байгаа ч Дарханы замд гарсан ахиц алга. Сайдаасаа гадна хоёр оны зааг дээр авлигын хэрэгт холбогдож, үйлдэл дээрээ гардуулсан ЗТХЯ-ны Замын ашиглалт, засварын хэлтсийн дарга Х.Оргил-Эрдэнэ хүртэл “Хоцрогдлыг арилгуулах шаардлага өгсөн. Энэтхэгийн зөвлөх компани өдөр тутмын хяналтаа тавьж байна. Төлөвлөсний дагуу арваннэгдүгээр сарын 1-нд хөдөлгөөнийг нээнэ” гэж улс даяар зарлаж байсан удаатай.

Түүнчлэн Улаанбаатар-Дархан чиглэлийн замын бүтээн байгуулалтад ажиллах 105 ажилтныг чартер нислэгээр татаж авах талаар өнгөрсөн дөрөвдүгээр сард мэдэгдэж байв. Гэвч Улсын онцгой комиссоос эдгээр иргэдийг авах хугацааг хойшлуулахаар шийдвэрлэсэн. Ингээд Улаанбаатар-Дархан чиглэлийн авто замын бүтээн байгуулалтын ажил хэзээ хийгдэх нь тодорхойгүй хэвээр үлдлээ.

Энэ авто замаар өдөрт дунджаар 5800 тээврийн хэрэгсэл зорчдог. Харин амралт зугаалгын үеэр 12.300 тээврийн хэрэгсэл зорчин өнгөрдөг гэсэн судалгаа бий. Иймээс Монголын хамгийн эрчимтэй, хөдөлгөөнтэй замд тооцогддог. Улаанбаатар-Дархан чиглэлийн авто замыг дөрвөн эгнээтэй болгож, бүрэн ашиглалтад оруулахад ахиад нэг жил шаардагдах нь. Б.Энх-Амгалан сайд аа, Улаанбаатар-Дархан чиглэлийн авто зам хаачсан бэ? Хэзээ ашиглалтад орох вэ?

ТОДРУУЛГА: ЗАМЫН ДЭЭД ТАЛЫН ГУРВАН ҮЕИЙГ ХИЙЖ ЧАДАХГҮЙ УЧРААС ЗАМЫН АЖИЛ ЗОГСОНО

Улаанбаатар-Дархан чиглэлийн авто замд хяналт тавьж буй “АЙ СИ ТИ консалтинг” компанийн зөвлөх С.Очирбат: Өнгөрсөн оны зургаадугаар сарын сүүлээр зам барих гэрээ байгуулж, нэг жилийн хугацаанд ашиглалтад оруулахаар бэлдэж байсан юм. Хугацаагаар энэ жилийн зургаадугаар сард ашиглалтад оруулах байсан. Өнгөрсөн жил ашиглалтад оруулах биш, хучилтаа дуусгах төлөвлөгөөтэй байсан.

Энэ оны нэгдүгээр сард жилийнхээ төлөвлөгөөг гаргаж, хоёр талдаа батлаад ажилдаа орох гэж байсан. Нийтдээ 1298 хятад ажилчин, Монголын 300 ажилчин ажиллах график гаргаж, БНХАУ-ын цагаан сарын дараа ажилдаа орох байтал шинэ төрлийн коронавирусын халдвар гарч, хөл хорионоос болоод урд хөршөөс ажилчид орж ирэх боломжгүй болсон. Гэхдээ гурван компани ажлаа явуулж байгаа. Нэг, гурав, тавдугаар багцын ажил хийгдэж байна. Нэг, гурав, тавдугаар багцын ажлыг гүйцэтгэж байгаа компани нь Хятадын компани хэрнээ Монгол төлөөлөгчтэй. Одоогийн байдлаар зам дээр 380-аад хүн ажиллаж байна. Гуравдугаар сард түр замаа зассан. Дөрөвдүгээр сард гүүр хоолойны ажил болон далангийн өргөтгөл, дэд суурийн ажлыг хийж байгаа. Мөн туслах суурийн ажлыг хийнэ. Гүүр хоолой, далангийн ажил тавдугаар сарын 20-н гэхэд дуусна. Үлдэж байгаа дээд талын гурван үеийн хучилтыг Хятадууд хийнэ.

Таван багц дээр нийтдээ 105 хүн байгаа. Эдгээр хүмүүс дотор гол инженер, техникийн хүмүүс байгаа. Тухайлбал, геодезийн, материалын, удирдах инженерээс гадна тоног төхөөрөмжийн гол хүмүүс болох чулуу бутлагч, хольц бэлтгэх үйлдвэрийн гол оператор ирэх байсан. Эдгээр хүмүүс орж ирэхгүй бол үйлдвэрийн бааз хөдлөхгүй. Техник хэрэгслийг нь талбай дээр бүрэн угсарчихсан байгаа. Одоо тавдугаар сарын 20-ноос зарим ажил нь нам зогсоно. Гүүр, хоолой, дэд суурийн ажлуудыг хийгээд дуусч байгаа. Замын дээд талын гурван үеийг хийж чадахгүй учраас замын ажил зогсоно. Үүнд хучилт хийх ажилчид урд хөршөөс ирэх юм.

ХОЁР, ДӨРӨВДҮГЭЭР БАГЦЫН ҮНДСЭН ЗАМЫГ ХАРИУЦАЖ БАЙГАА ХҮН БАЙХГҮЙ

Ер нь хоёр, дөрөвдүгээр багц хүндрэлтэй. Бусад гурван багц ашиглалтад орлоо гэж бодоход хоёр, дөрөвдүгээр багц нь үлдэхээр байгаа. Одоогоор энэ хоёр багцын үндсэн замыг хариуцаж байгаа хүн байхгүй байна. Ажил хийгдэхгүй байгаа.

Ерөнхийдөө нэг, гурав, тавдугаар багц түр замаар явна. Түр замаа шороо тоос гаргахгүйгээр хучилтай болгох тооцоо гаргасан. Нийтдээ 30 тэрбум төгрөг хэрэгтэй. Өнөөдөр эдийн засгийн нөхцөл байдал хүнд байгаа учраас замын ажилд зориулж 30 тэрбум төгрөг гаргах үнэхээр хүндрэлтэй. Иймээс захиалагч талтай ярилцаж байгаад хайрга, шороон замаар явуулахаар шийдсэн. Түр зам дээр өдөрт нэг удаа усалгаа хийхэд дөрвөн сарын хугацаанд гурван тэрбум төгрөг хэрэгтэй байгаа” гэдгийг онцоллоо.