Н.Номтойбаяр: Надад ирсэн төсөөлөөгүй их итгэлийг эрс өөрчлөлт хийхийг хүссэн иргэдийн итгэл гэж харж байна

Ц.Анударь / Улстөр

2020 оны УИХ-ын ээлжит сонгуульд бие даан нэрээ дэвшүүлэгчийн баримт бичгийг Сонгуулийн ерөнхий хороо хүлээн авсан тухай Хан-Уул дүүргээс бие даан нэр дэвшигч Н.Номтойбаяр өөрийн фэйсбүүк хуудаснаа нийтэлжээ.

image

Тэрээр энэ талаар хэлэхдээ, “Хан-Уул дүүрэгт бие даан нэр дэвшигч Н.Номтойбаяр миний бие Сонгуулийн ерөнхий хороонд материалаа бүрдүүлж өгснөөр #76 бүртгэгдлээ. Захиалгат улс төр, хуурамч сошиал хаягуудад тархиа угаалгасан нь яллаад байдаг боловч хуулиараа бол ялгүй юм л даа. Дэмжсэн олонд дахин талархал илэрхийлье” гэсэн байна.

image

Түүнчлэн Хан-Уул дүүргийн нийт сонгогчдод хандан, “УИХ-ын сонгуульд Хан-Уул дүүрэгт бие даан нэр дэвшигч Нямтайширын Номтойбаяр намайг дэмжиж гарын үсгээ зурсан болон хуулийн хугацаанд дэмжлэгээ баталгаажуулж амжаагүй мянга мянган дэмжигчиддээ талархал илэрхийлье!

Надад ирсэн энэ төсөөлөөгүй их итгэл Н.Номтойбаярыг гишүүн болгохоос илүүтэй өнөөгийн улс төр, нийгэм эдийн засагт эрс өөрчлөлт хийхийг хүссэн иргэдийн итгэл гэж би харж байна” гэжээ.

Эргэн сануулахад, УИХ-ын гишүүн асан Н.Номтойбаяр ХЗДХ-ийн сайд Ц.Нямдоржийн дэвших тойрогт өрсөлдөнө гэдгээ хэвлэлээр дамжуулан зарласан. УИХ-д хоёр удаа сонгогдож, сайд, дэд сайдын алба хашиж, 20 гаруй хууль санаачилж батлуулсан түүнд ажлын туршлага чамгүй их бий.