Даваа гаригаас хөл хориог сулруулах тухайгаа Улсын онцгой комисс мэдэгдлээ. Цар тахлыг хумьж, ялан дийлсэн учраас ийнхүү онцгой байдлын зэргийг сулруулж байгаа юм биш. Ялагдсан учраас, яаж ч чадахаа больсон болохоор аргаа барсандаа эдийн засаг, бас дахин эдийн засаг гэсэн шалтаг гаргаж ирээд аюулт өвчинг хазааргүй тавьж байна. Яг Буриад шиг ялагдлаа хүлээн зөвшөөрсөн нь энэ. Буриадууд өвчний тархалт 0 байхад онцгой дэглэм тогтоосон ч 1000 давсан хойно нь хорьж хүчрэхгүй учраас ард иргэддээ үнэнээ хэлж хорио цээрийн дэглэмээ цуцалсан. Харамсалтай нь Шадар сайд Я.Содбаатарт үнэнээ хэлээд, ялагдлаа зөвшөөрөөд чаддаг хүнд нь ажлаа өгчих улс төрийн соёл, совист алга. Я.Содбаатарыг Ковидын эсрэг хамгийн том багийг ахалж ажилласнаас хойш өвчнийг дотооддоо алдаагүй монгол гэх рекорд нурж, 1400 гаруй хүн өвчилж нийслэлийн бараг бүх эмнэлэг голомт болж хувирлаа. Эдгэж байгаа нь бий ч эдгээсэн гавьяа Я.Содбаатарынх биш.

Хориод байхад тараад байгаа, хорих ёстой газраар нь голомтлон түгээд байгаа юм чинь өвчинг сул тавихаар юу болох вэ. Энэ л нийт иргэдийн эмзэглэж байгаа сэдэв. Одоо өвчинг сул тавихаар Монголын томоохон үйлдвэрүүд, томоохон оффисууд голомт болно. Яг Баянзүрх ЭМТ, Ачтан, Сонгдо, Мөнххада шиг. Удахгүй энэ өвчин хөдөө гарч, 21 аймгаараа, гурван саяулаа вирус тээгч, хоригдол, зомби болж хувирна. Өвчнийг устгах ёстой Эрүүл мэндийн төвүүд, хувийн томоохон эмнэлгүүд Ачтан, Сонгдо өвчний үүр болсон шиг. Энэ газрууд иргэдийг эдгээх биш эсрэгээр нь өвтгөх газар болсныг өглөө бүр сонсч байна. Сүүлдээ монголчууд хангалттай дөжирч аюул ба аз жаргал, өвчин ба эрүүлийг ялгаж бодохоо ч больсон байна. Ийм нөхцөлд хүргэсэн багийг удирдагчаас нь эхлээд явуул. Хариуцлага ярих цаг нь одоо. Түүнээс биш 32 мянган халдварлаж 1500 хүн үхсний дараахь хариуцлага хэнд ч хэрэггүй, Ерөнхий сайд аа. Одоо эсвэл хэзээ ч үгүй гэдэг билүү. Хэтэрхий сул, шийдвэр гарган улсаа аюулаас хамгаалах чадваргүй Я.Содбаатар таны багт болоод Монгол Улсад хэрэгтэй гэж харагдахгүй байна.