Би нэг зүйлийг ойлгохоо больчихлоо л доо. АН бүх юманд буруутай болоод явчих юм. Өчигдрийн жагсаал цуглаан АН-ын буруу, хоёр парламент дамжсан эдийн засгийн бүх л асуудал АН-ын буруу байсан. Одоо Ерөнхийлөгчийн ч буруу болоод явчихлаа. Би бүр сүүлдээ ойлгохоо байлаа. Энэ бол зүгээр урдаас төлөвлөсөн том жүжиг л харагдаж байгаа. Цаашдаа солонгос сериал шиг олон серүүдтэй. Тэгэхээр энд Ерөнхийлөгч ч буруугүй, АН ч буруугүй. Энэ бол МАН-ын дотоодын зөрчил дээд цэгтээ тулсных. Монгол Улсын стратегийн ордын тэмцэл, албан тушаалын тэмцэл, эрчүүд эзэгнэсэн улс төрийн өмнөх хойтох өшөө авалт энэ бүхэн чинь эцэстээ тулаад өнөөдөр энэ асуудал руу явж байна уу гэж харж байна. Яахав миний буруу байж магадгүй. Манай АН-ын тэмцэл ил байдаг. Бид нарт булаацалдах юм байдаггүй, улсын төсвөөр бариулсан арван тэрбум төгрөгийн үнэтэй намын байр байдаггүй учраас булаацалдаад байх юм байдаггүй. Нэг тамга л булаацалддаг. Бүх юм нь ил байдаг. Гэтэл энд цаанаа маш том намын зөрчил явж байгаа шүү гэдгийг хэлье. Ээжүүдийн асуудал нөлөөлсөн нь бол нөлөөлсөн байгаа. Үүнийг бол ойлгож байна. Монголчууд үнэхээр хүний эрхийн төлөө, ээжүүдийн төлөө явж байгаад баярлаж байна. Залуучууд өчигдөр үнэхээр мундаг байсан. Гэхдээ манай улстөрчид анх удаа ийм зүйл харж байгаа юм шиг амьдралаас тасархай юм битгий ярьж бай. Та нар тэр Эх нялхасын төвийнхөө эхчүүд төрдөг орчинг очоод хар. Аймгийн төвд ээжүүд төрчихөөд хоёр хоноод гар гээд, сумын төвөөс мотоцикль дээр шинэ төрсөн ээж салхи татуулаад ямар их өвчин олоод явдгийг өчнөөн мэдэж л байгаа шүү дээ. Тэр төрөх эмнэлгүүдээ очоод хар та нар ямар байдалтай байгаа билээ. Тийм учраас би энэ шалтгааныг өөр юм л гэж харж байна. У.Хүрэлсүх сайдын хувьд үнэхээр зургаан сарын өмнө сонгууль хийгээд ард түмэн дэмжсэн. Энэ хүн бол үнэхээр ковидын дараа дараагийн давалгааг ялах юм байна. Эдийн засгийн хямралаас гаргаж чадах юм байна гэж энэ хүнд итгэсэн. Гэтэл зургаан сар ч бололгүй ард иргэдийнхээ итгэлийг даахгүй, дундаас нь хаяад явж байгаа нь харамсалтай байна. Монголын төр тогтвортой байх ёстой гэж би үздэг. Өнөөдөр МАН-аас 11 эмэгтэй УИХ-ын сонгуульд ялаад орж ирсэн. Энэ үр дүнг би намын даргын ажилтай холбож үздэг. Үнэхээр мундаг байна. Олон эмэгтэйчүүдээ ялуулаад гаргаад ирсэн. Энд бол магтах авах юм байна. Гэхдээ та гадаадад гацсан монгол иргэдийхээ төлөө төдийлөн орж ажиллаагүй шүү гэдэгт гомдож явдагаа хэлмээр байна. Сайн ажилласан жилүүдийг би сайнаар нь л хэлдэг. Өнөөдрийн сонинуудад бичсэн байгаа. Олон оюутнууд гадаадад явж чадахгүй сургуулиасаа хөөгдөх гээд байна гэхэд Зам тээврийн сайд Халтар, Содбаатар сайд нар маш хурдан арга хэмжээ авч өгөөд энэ хүмүүсийг бүгдийг шийдээд явуулж байсан. Би сайн юмыг сайнаар л ярина. Муу юм бол байна. Та нар гадаадад байгаа 20 мянган монголчууддаа нэг даргын нэг жипний мөнгийг л хуваарилсан. Би үүнээс ичиж байна. Гурван зуухан сая төгрөг хуваарилсан. Хилийн чанадад байгаа монголчуудад 224 сая төгрөгний 50 хувь нь шарил авчрах зардалд зарцуулагдсан байгаа. Ингэж монголчууддаа ханддаггүй юм. Өнөөдөр монголд гадаадын дипломат төлөөлөгчийн газруудад та нар иргэдтэйгээ ажилла гээд нэг ч төгрөг хуваарилаагүй. Харин хэмнэсэн төсвийг нь татсан. Гэтэл бусад орны гадаад яамныхан бол Ёслолын хэлтсийнхэн нь ард иргэдийнхээ араас явж ажиллаад бүх иргэдээ нутагт нь аваад ирсэн. Энэ асуудал дээр үнэхээр гомдолтой байдаг.