ОХУ, Беларусь болон бусад хэд хэдэн орны цэргүүдийн оролцож буй сургуулилт эхлээд байна. Запад-2021 цэргийн сургуулилт ОХУ-аас гадна Беларусийн нутаг дэвсгэрт зохион байгуулагдаж байгаа бөгөөд Оросын тал байлдааны сургуулилтад анх удаа робот орууллаа.

ОХУ-ын Ерөнхийлөгч Владимир Путин Москва хотоос зүүн зүгт 450 км зайтай, Новгородын бүсэд болж буй цэргийн сургуулилтын талбайд даваа гарагт зочилсон. ОХУ, Беларусийн хамтран зохион байгуулж буй Запад-2021 сургуулилтад Монгол, Армен, Энэтхэг, Казахстан, Киргизстаны цэргүүд оролцож байна. Тус сургуулилтад нийт 200 мянган цэрэг хамрагдаж байгаа юм.

Дайны орчинд байлдааны робот хэрэглэсэн анхны тохиолдол энэ болж байгаа тухай ОХУ-ын Батлан хамгаалахын яам мэдээлжээ. Дээрх робот нь пулемёт болон тэсрэх бөмбөг шидэгчээр тоноглогдсон юм байна. Барууны орнууд Украинтай таагүй харилцаатай байгаа цаг үед энэхүү сургуулилт болж байгаагаараа онцлогтой.

Даваа гарагт Польш, Эстон тэргүүтэй хэд хэдэн Европын орны Гадаад хэргийн сайд Запад-2021 сургуулилтад сэтгэл түгшиж буйгаа илэрхийлжээ. Харин Кремлийн зүгээс Запад-2021 аливаа нэг улс орны эсрэг чиглэгдээгүй, тогтмол явагддаг сургуулилтуудын нэг гэж хариу мэдэгджээ.