Энэ өвөл барууны орнууд эрчим хүчний хомсдолд орж хөлдөх эрсдэл хаяанд ирж буйг CNN агентлаг мэдээллэж байна. Жишээ нь, хэт хуурай цаг агаараас шалтгаалан Норвегид усан цахилгаан станцын хүчин чадал буурч, Франц дахь атомын цахилгаан станцуудын цөмийн тогоонууд халах эрсдэлд орсон бол Германд нүүрсний тээвэр саатжээ. Хамгийн гол нь геополитикийн зөрчлөөс болж ОХУ-аас Европ руу байгалийн хий нийлүүлэх цоргоо багасгахаа мэдэгдсэн. Энэ европын орнуудад том цохилт болж байна. Мөн Европын сэрүүн бүс нутгуудаар ч хэт халж, ган гачиг болсон бөгөөд Францад хээрийн түймэр олон гарчээ. Итали улсад 1800 оноос хойш болоогүй хуурай зун болж, ургац алдах эрсдэл үүссэн байна. Норвегийн эрчим хүчний нийлүүлэлтийн 90 хувийг усан цахилгаан станцаас хангадаг төдийгүй хөрш орнууддаа экспортолдог. Гэвч улс төрийн зөрчил болон үнийн өсөлтөөс шалгаалан сүүлийн 25 жилийн хугацаанд анх удаа Норвегид эрчим хүчний хангамжийн асуудал үүсэх болоод байна. Украинд явуулж буй дайны улмаас барууныхан ОХУ-ын эсрэг эдийн засгийн хориг тавьсан. Үүний хариуд Москва байгалийн хийн нийлүүлэлтээр барьцаалж эхэлсэн.

Европт үүссэн нөхцөл байдлыг “Эрчим хүчний хямрал” гэж салбарын мэргэжилтнүүд, улстөрчид онцолж байна. Хямралыг шийдвэрлэхийн тулд эрчим хүч импортлох гэрээ хэлцэлүүдийг эрэлхийлж байгаа ч одоогоор асуудлыг шийдэх боломж хомс байгаа аж. Норвеги улс нь байгалийн хий, газрын тосоор баялаг орон боловч Европын зах зээлийг хангалттай хэмжээнд хангах боломжгүй байгаа юм.