Өнгөрсөн амралтын өдөр болсон дэлбэрэлтийн улмаас эвдэрсэн Крымийн гүүрийг засварлах ажил ирэх оны долдугаар сард дуусна гэж ОХУ-ын Засгийн газрын цахим хуудсанд нийтлэгдсэн мэдээлэлд дурджээ. Керчийн хоолойн гүүр гэгддэг 18 км урт Крымийн гүүр нь ОХУ болон Крымийн хойгийг холбосон гол гарц юм.

Энэ сарын наймны өдрийн үүрээр гүүрэн дээр явж байсан ачааны машинд дэлбэрэлт болж, гүүртэй зэрэгцэн орших төмөр замын гүүрэн дээрх шатахуун ачсан ачааны галт тэрэг дэлбэрсний улмаас авто замын зарим хэсэг нь нурсан. ОХУ-ын Ерөнхийлөгч В.Путин үүнийг Украины зохион байгуулсан “терроризм” гэж мэдэгдэв.

Тэрбээр телевизэд өгсөн ярилцлагын үеэрээ “Украин улс террорист халдлага үйлдэх оролдлогыг үргэлжлүүлбэл ОХУ хатуу хариу үйлдэл үзүүлнэ” гэдгийг анхааруулсан байна.