2022 оны арванхоёрдугаар сарын 31-ний байдлаар нийт нутгийн 70 гаруй хувьд цастай байгаагаас Алтай, Хангай, Хэнтэй, Хөвсгөлийн өндөрлөг уулсаар 20.1 см-ээс их байна. Увсын Давст, Улаанбаатарын Багануур, Төвийн Эрдэнэд 22-26 см, Увсын Тэс, Баруунтуруун, Малчин, Хяргас, Ховдын Булган, Алтай, Үенч, Завханы Цагаанчулуут, Баянтэс, Улиастай, Баянхайрхан, Тэс, Баянхонгорын Заг, Хөвсгөлийн Цагаан-Үүр, Алаг-Эрдэнэ, Эрдэнэбулган, Цагааннуур, Чандмань-Өндөр, Булганы Хангал, Орхоны Баян-Өндөр, Сэлэнгийн Орхон, Ерөө, Хүдэр, Түшиг, Хушаат, Орхонтуул, Төвийн Мөнгөнморьт, Эрдэнэ, Цээл, Угтаалцайдам, Алтанбулаг, Жаргалант, Хэнтийн Баян-Овоо, Батширээт, Норовлин, Баян-Адарга, Хэрлэн, Цэнхэрмандал, Өмнөдэлгэр, Жаргалтхаан, Сүхбаатарын Асгат, Дорнодын Булганд 10.1-20.0 см байна. Харин Увс, Завхан, Баянхонгор, Өвөрхангай, Хөвсгөл, Булган, Сэлэнгэ, Дархан-Уул, Орхон, Төв, Хэнтий, Сүхбаатар, Дорнодын зарим, Баян-Өлгий, Ховд, Говь-Алтай, Архангайн ганц нэг сумдын нутгаар 5.1-10.0 см, бусад нутагт 1-5 см, гуу жалга, хунгарласан газартаа 15-30 см зузаан цастай байна

Арванхоёрдугаар сарын сүүлийн 10 хоногт орсон хур тунадасны хэмжээг олон жилийн дундажтай харьцуулбал 70 гаруй хувьд дунджаас ахиу, 30 орчим хувьд дунджийн орчим ба түүнээс бага байжээ. Харин салхины хурд тал хээр, говийн нутгаар түр зуур 16-25 м/с буюу аюултай үзэгдлийн хэмжээнд хүрч салхилсан байна.