“Лос Анжелес Лейкерс” багийн супер од Леброн Жеймс Америкийн үндэсний сагсан бөмбөгийн холбооны /NBA/ бүх багийн эсрэг тоглолтод 40-өөс доошгүй оноо авсан анхны сагсанбөмбөгч боллоо. Өдгөө 38 настай тэрбээр Лос-Анжелес хотын “Crypto.com” аренад мягмар гарагт болсон “Лос Анжелес Клипперс” багийн эсрэг тоглолтод 46 оноо авснаар энэхүү амжилтын эзэн болжээ.

Хэдийгээр “Клипперс” нь Л.Жеймсийн хувьд эсрэг тоглолтынх нь үеэр 40-өөс доошгүй оноо оруулсан “NBA”-ын 30 дахь баг болсон ч “Лейкерс”-ийг 133-115 онооны харьцаагаар буулган авсан байна. Тэрбээр мөн тоглолтын үеэр 3 онооны есөн шидэлтийг амжилттай гүйцэтгэжээ.

Л.Жеймс домогт сагсанбөмбөгч Карим Абдул-Жаббарын тогтоосон бүх цаг үеийн хамгийн олон оноо авсан амжилтыг эвдэхэд ердөө 177 оноо дутуу байна. “Лейкерс”-ийн төвийн тоглогч асан, өдгөө 75 настай К.Абдул-Жаббар 1989 онд зодог тайлахаасаа өмнө 1560 тоглолтод 38 387 оноо авчээ. Одоогоор Л.Жеймс 1404 тоглолтод 38 210 оноо аваад байна. Энэ улиралд “Лейкерс” 22 хожиж, 26 хожигдсон үзүүлэлтээр “NBA”-ын Өрнөд бүсийн 13 дугаарт жагсаж байна.