БШУ-ы сайд Л.Энх-Амгалан: Хамгийн залуу багшийн цалин 1,050,000 төгрөгөөс эхэлж байна. Ажилласан жил, зэргээс шалтгаалж багш нарын дундаж цалин 1.6-1.8 сая төгрөг болсон... хэмээн мэдэгдлээ.

Гэвч асуудал тоондоо бус чанарт байна. Хэдий хамгийн багш нарын хамгийн залуу нь 1.0 сая төгрөгийн цалин нэрлүүлэн авч байгаа ч нийгмийн даатгал, бусад татвар хураамжаа төлөөд гар дээрээ 800 орчим мянган төгрөг л авдаг. Иймээс үнийн өсөлтийн нөлөөгөөр өрхийн сарын хэрэглээнд хүрэхгүй болсон нь үнэн юм. Ялангуяа хөдөө орон нутагт ажиллаж амьдарч буй залуу багш нарын цалин үүнээс бүр ч бага буюу 700 орчим мянган төгрөг гар дээрээ бэлэн авдаг ажээ.

Улс орны хөгжлийн үндсэн тулгуур бол боловсрол. Гэтэл боловсролын салбарын хөшүүрэг болсон сурган хүмүүжүүлэгчдийн үнэлгээ ийм түвшинд байгаа нөхцөлд сайн үр дүн нэхэх эрхгүй гэж хэлэхэд хилсдэхгүй.

Сарын хэрэглэгдэхүүний 120 мянган төгрөгийн үнэ бүхий принтерийн хор, бал, бичгийн цаас зэргийн ЕБС-ийн багш нарт олгодог ч энэ нь төдийлөн бодит дэмжлэг болж чадах эсэх дээр тодорхой судалгаа дүгнэлт хийгдээгүй.

Дээрээс нь хэрэглэгдэхүүн нийлүүлдэг тендерийн компаниуд нь ашиг сонирхолын зөрчилгүй, ил далд цавчаагүй ажиллаж чадаж байгаа эсэх дээр ч мөн анхаарал хандуулах шаардлага бий.

Боловсролын салбарыг улс төрийн аргаар удирдах, хэт дэвэргэн мэдэгдэл байн байн хийх нь бодлогын тогтвортой байдалд сөрөг нөлөөтэйг мартаж боломгүй.

Боловсролын яамны сүүлийн нэг сарын мэдээллээс нэгтгэн дүгнэвэл салбарын санхүүгийн тогтолцоо, багш нарын хөгжил, салбарын бүтцийн менежмэнтийг л анхаарчээ. Харин бодлогын суурь өөрчлөлтийн асуудлыг төдийлөн дурьдаагүй аж. Дэлхийн нэн шинэ хандлагад тохируулан Монголын онцлогт тохирсон боловсролын цогц системийн өөрчлөлтийг нэвтрүүлэх цаг хэзээ вэ? Цалин цагаа, төсөв санхүү, засаглалаа ярьсаар л дуусах уу?