Хятадын Цаг уурын үндэсний төв “Саола” хар салхи ойртон ирж байгаатай холбогдуулан хар салхины аюулын хамгийн дээд буюу улаан түвшний сэрэмжлүүлэг гаргажээ. Энэ онд Хятадад нүүрлэж буй ес дэх шуурга болох “Саола”-гийн нөлөөгөөр нутгийн зүүн хэсгээр хүчтэй салхилж, аадар бороо орох төлөвтэй байна. Пүрэв гаргийн оройны 17:00 цагийн байдлаар Хятадын өмнөд нутгийн Гуандун мужийн Хуйлай тойргийн зүүн өмнөд хэсэгт 330 орчим км зайд далайн дээгүүр ажиглагдсан шуурга баруун хойд зүгт 10 км/цагийн хурдтай урагшилж, эрч нь аажмаар сулрах төлөвтэй байна гэж Цаг уурын үндэсний төв мэдээлжээ.

Шуурганы нөлөөгөөр Хуйлайгаас Хонконг хүртэлх эрэг орчмын бүсүүдэд баасан гаргийн үд дундаас шөнө хүртэл хөрс нурах, эсвэл баруун тийш чиглэж, хөрсний нуралт үүсгэхгүйгээр Гуандуны зүүн нутгийн усан хэсгийг дайран өнгөрч магадгүй байна.

Мөн Баши суваг, Тайванийн хоолой, Өмнөд Хятадын тэнгисийн зарим хэсэг, мөн Фужянь, Гуандун, Тайванийн эрэг орчмын бүсэд пүрэв гаргийн өглөөний 08:00 цагаас баасан гаргийн өглөөний 08:00 цаг хүртэл хүчтэй салхилах төлөвтэй байна. Энэ хугацаанд Фужянь, Гуандун, Тайванийн нутгаар хүчтэй аадар бороо орж, зарим газарт 100-220 мм хур тунадас унана.

Цаг уурын үндэсний төвийн зүгээс, гадна талбай болон битүү орчинд олноор цугларахгүй байх, гадна орчинд гүйцэтгэх ажлыг түр зогсоох зөвлөмж гаргаж, нурж сүйдэж болзошгүй байранд амьдардаг хүмүүсийг нүүлгэн шилжүүлэхийг зөвлөжээ. Мөн хар салхины болзошгүй аюулаас урьдчилан сэргийлэх арга хэмжээнүүдийг авахыг уриалсан байна. Хятад улс хар салхины аюулыг анхааруулан мэдээлэх дөрвөн түвшний системтэй бөгөөд аюулын хамгийн дээд түвшнийг улаан, үлдсэн гурван зэрэглэлийг улбар шар, шар, хөх өнгөөр тэмдэглэдэг.