Өчигдөр үдээс хойш 16 цагийн орчимд Японы төвийн бүсийн Ишикава мужид 7,6 магнитутын хүчтэй газар хөдөлж, улс даяар онцгой байдал зарласан. Өнөө өглөөний байдлаар газар хөдлөлтийн учруулсан хохирлын хэмжээ их байна. Газар хөдлөлтийн улмаас нурангид дарагдаж амиа алдсан хүний тоо 20 болж өссөн. Өөр бусад нурангид дарагдсан байж болзошгүй иргэдийг 1000 орчим аврагч эрэн хайсаар байна. Ишикава мужаас гадна Нийгита, Фүкүи, Тояама, Гифү мужуудад газар хөдлөлт бүртгэгдэж, хүмүүс олноор бэртэж гэмтсэн гэсэн мэдээлэл байна. Хүчтэй газар хөдлөлтийн улмаас цунамийн түгшүүр зарлаад байсан ч өнөө өглөөний байдлаар цунамийн эрсдэл багассан гэж үзэж, далайн эргийн хотуудын түгшүүрийн түвшнийг бууруулсан байна.

Одоогийн байдлаар амиа алдсан хүмүүсийн тоо өсөж байгаагаас гадна гол үүсээд байгаа бас нэг асуудал нь яаралтай тусламж, нэн шаардлагатай эмнэлгийн үйлчилгээнүүд хэд хэдэн мужид тасалдаад байгаа юм. Газар хөдлөлтийн голомттой ойр гурван мужид 19 эмнэлгийн байгууллагад тог цахилгаан болон ундны ус тасалдаад байна. Зарим эмнэлэг өвчтөнүүдээ нүүлгэн шилжүүлэхээс өөр аргагүй нөхцөл байдал үүслээ гэж Японы эрүүл мэндийн яамнаас мэдээлж байна. Японы эргийн дагуу Цунамийн түгшүүр унтарсан тул усан замаар Японы баруун умард хэсгийн алслагдмал Ното хойгт газар хөдлөлтөд өртсөн хүмүүсийг аварч эрэн хайх ажиллагаа эхлүүлнэ гэж ерөнхий сайд Кишида Фүмио мэдэгдлээ. Газар хөдлөлтийн улмаас Ишикава мужийн Важима хотод 25 барилга нурсны 14-т хүмүүс гацсаныг аврахаар ажиллаж байна гэж мэдээлж байна. Тус хотод мөн өнгөрсөн шөнө гал түймэр гарч жуулчдын зорьж очдог Асаичи гудмаар 200 орчим барилга шатжээ.

Өнөө өглөөний байдлаар гал түймрийг унтрааж, цааш тархах эрсдэл багассан гэж онцгой байдлынхан мэдээлж байна. Важима хотын нисэх буудал дээр 500 орчим хүн одоогоор гацсан байгаагийн дотор нутгийн иргэдээс гадна аялагч, жуулчид, нисэх буудлын ажилчид байгаа юм байна.

Ишикава мужийн Сүзү хотод гэхэд мөн л 53 барилга нурсан, эрэг дагуу хэд хэдэн завь хөмөрсөн дүр зурагтай байна. Ишикава мужийн Каназава, Нанао, Шика зэрэг хотуудад мөн барилга байгууламж ихээр нурсан гэж мэдээлж байна. Өчигдрийн 7,6 магнитудын газар хөдлөлт дангаараа болоод дууссангүй, газар хөдлөлтийн дараах сулавтар хэмжээтэй чичиргээ үргэлжилсээр байсныг иргэд хэлж байна. Японы өндөр хурдны дөрвөн Хокүрикү Шинкансэн галт тэрэг газар хөдлөлтийн улмаас 11 цаг гацсан байсан ч өнөө өглөө хөдөлж, зогсоолдоо хүрч чадсан гэж мэдээллээ. Тус дөрвөн галт тэргэнд нийтдээ 1400 зорчигч явж байсан байна. Газар хөдлөлтийн мэдээлэл олон улсад цацагдахтай зэрэгцэн АНУ-ын ерөнхийлөгч Жое Байден Японд шаардлагатай бүх төрлийн тусламж явуулахад бэлэн гэж мэдэгджээ.