Саяхан Монгол Улсын Төрийн Албаны Зөвлөлөөс Батлан Хамгаалах Яаманд хууль зөрчсөн томилгоонуудаа яаралтай залруул гэсэн үүрэг бүхий хатуухан шийдвэр явуулжээ. Учир нь Батлан Хамгаалах Яамны Төрийн нарийн бичгийн дарга Д.Ганхуяг сүүлийн 4 жилийн турш Төрийн албаны хуулийг ноцтой зөрчсөөр ирсэн болохыг Төрийн Албаны Зөвлөлөөс хийсэн шалгалтаар тогтоосон байна.

Уг нь төрийн нарийн бичгийн дарга нь "...яамны хэмжээнд мөрдөх дүрэм, заавар, журмыг хууль тогтоомж, Ерөнхийлөгчийн зарлиг, Засгийн газрын шийдвэр, сайдын тушаалд нийцүүлэн баталж, мөрдүүлэх;' үүрэгтэй атал харин ч эсрэгээрээ хууль зөрчсөн хуудуутай томилгоо хийдгээрээ ийнхүү гаршиж, хууль бус үйлдэл нь Төрийн Албаны Зөвлөлийн хурц хараанд өртөөд байна.

Энэ бүхний автор нь Батлан Хамгаалахын Яамны Төрийн нарийн бичгийн дарга, бригадын генерал Д.Ганхуяг. Тэрээр алтны ченжүүдэд нэр нөлөөгөө ашиглан АНУ-ын виз гаргаж өгнө гэх асуудалд нэр холбогдон 3 үсэгтэй газарт ч дуудагдаад буй. Тодруулбал өөрийн дотны найз алтны уурхайн эзэнд Батлан хамгаалах яамны шугамаар Америкт айлчилна гээд виз мэдүүлсэн нь баригдаад АТГ-т шалгагдаж байгаа.

Уг асуудлаас болоод хоёр улсын Батлан хамгаалах салбарын харилцаа ч нилээн хүйтэрсэн гэдгийг яамныхан нь жиг жуг хийлцэн ам дамжуулан ярилцдаг аж. Мань этгээд Төрийн албаны зөвлөлөөс анхааруулж, сануулсаар байтал илтэд хууль тогтоомж зөрчиж, төрийн албаны шалгуур хангахгүй 16 хүнийг яаманд шургуулаад авсан нь шалгалтаар ил болсон.

Төрийн жинхэнэ албан хаагчийн местэд ямар ч сонгон шалгаруулалтгүйгээр өөрөөр хэлбэл ар өврийн хаалгаар шууд томилгоо хийж нэр бүхий 16 хүнийг томилсон аж.

Төрийн Албаны Зөвлөлийн шалгалтаар хуулийн шалгуур шаардлага огт хангахгүй байгаа тэрхүү 16 хүнд Батлан Хамгаалах Яамны Газрын дарга Т.Наранхүү, Б.Оюунгэрэл, Эрхэмбаяр, Хэлтсийн дарга Ж.Банзрагч, С.Түвшинтөгс, Г.Энхболд нарын нэрс багтсан байна.

Төрийн албанд, тэр тусмаа бүхэл бүтэн тусгаар Монгол Улсын үндэсний аюулгүй байдлыг сахин хамгаалах яамны ТНБД нь томилогдсон цагаасаа буюу сүүлийн 4 жил гаруй хугацаанд ёстой л дунд чөмгөөрөө дураараа жиргэсний илрэл ганц үүгээр ч тогтохгүй аж.

Ийм хүнийрхүү хүмүүсээр удирдуулсан яамных нь өнөөгийн нөхцөл байдал, байгаа царай, алба хаагчдынх нь ахуй амьдрал гундуу байхаас ч яах билээ.

Данхар төрийн том толгой болж дархлагдсан Төрийн нарийндаа Батлан Хамгаалахын сайд С.Бямбацогт, Монгол Улсын Ерөнхийлөгч, Зэвсэгт Хүчний Ерөнхий Командлагч У.Хүрэлсүх нар хариуцлага тооцох уу? , хамгаалж хаацайлж авч үлдэх үү ? гэдэг олон нийтэд сонин байна.

М.МӨНХ