Үндэсний хэмжээнд 5300 цэгт фото мониторинг хийж байна гэв

Газар зохион байгуулалт, геодези, зураг зүйн ерөнхий газар, “Дорнод Монголын хуурай хээрийн ландшафт, биологийн олон янз байдлын хамгаалал” төсөлтэй хамтран “Бэлчээрийн мониторингийн үндэсний сүлжээний тогтвортой үйл ажиллагааг хангах нь” сэдэвт хэлэлцүүлэг зохион байгуулав.
БОУАӨЯ, ХХААХҮЯ, Цаг уур, орчны шинжилгээний газар, Үндэсний статистикийн хороо, Ус, цаг уур, орчны судалгаа, мэдээллийн хүрээлэн зэрэг 28 байгууллагын 70 гаруй төлөөлөл энэхүү хэлэлцүүлэгт оролцлоо.
Энэхүү хэлэлцүүлгээр бэлчээрийн мониторингийн тогтолцооны өнөөгийн байдал, цаашдын хөгжлийг тодорхойлох, холбогдох байгууллагуудын хамтын ажиллагааг өргөжүүлэх, бэлчээрийн доройтлыг бууруулахад шинжлэх ухааны үндэслэлтэй бодлого боловсруулах, шийдвэр гаргах түвшинд оролцогч талуудын санал, зөвлөмжийг хүргэхэд чухал ач холбогдолтой аж.
Уг хэлэлцүүлэг Монгол орны бэлчээрийн газрын мониторингийн үндэсний сүлжээний үйл ажиллагааг сайжруулах, өнөөгийн байдал, бэлчээрийн доройтлыг бууруулах, цаашдын чиг хандлагыг тодорхойлох, салбар хоорондын болон орон нутгийн оролцоог нэмэгдүүлэх зорилготой юм байна.
Хэлэлцүүлгийн үр дүнд оролцогчдоос дараах дөрвөн үндсэн чиглэлийн хүрээнд санал, зөвлөмж гаргаж, холбогдох байгууллагуудад хүргүүлэхээр төлөвлөжээ.
Тухайлбал, бэлчээрийн газрыг хамгаалах, сайжруулах, нөхөн сэргээх, доройтлыг бууруулах чиглэлийн хууль, эрх зүйн орчныг сайжруулах, бэлчээрийн фото мониторингийн үйл ажиллагааг сайжруулах, газрын мониторингийн нэгдсэн мэдээллийн сан, цахим системийн өнөөгийн хэрэглээ, цаашид орчин үеийн техник, технологитой хослуулан сайжруулах, арга зүйг шинэчлэх, салбар хоорондын уялдаа холбоог сайжруулах ажээ.
Дорнод Монголын хуурай хээрийн төслийн менежер Т.Эрдэнэжаргал ярихдаа, “Зүүн бүсийн газрын доройтлын биологийн төсөл зүйлийн хомсдолоос сэргийлэх төслийг хэрэгжүүлж байна. Энэ хүрээнд уур амьсгалын өөрчлөлт, газрын доройтол, биологийн олон янз байдлыг харгалзан үзсэн аймаг, сумын газар зохион байгуулалтын төлөвлөгөө боловсрууллаа.
Монголчуудын хувьд хялганат хээр болон мал аж ахуй нөөц даац томоохон тал нутаг сүүлийн жилүүдэд уур амьсгалын өөрчлөлт, хүмүүсийн нөлөөгөөр доройтож байна. Үүнийг бууруулах, бэлчээрийн фото мониторинг цахим системийг сайжруулахын тулд бэлчээрээ өнжүүлж сэлгэж, ажлыг зохион байгуулах практик ажлыг хэрэгжүүлж цахим хөгжүүлэлт хийсэн. Үндэсний хэмжээнд 5300 цэгт фото мониторинг хийж байна” гэв.
Б.ЖАРГАЛ
Сэтгэгдэл