Өнөөдөр үдээс хойш Төрийн ордоны "Тамхины цэг"-ээс Засгийн газрын гурван гишүүн зодолдсон тухай мэдээлэл тарлаа. Чухам хэн, хаана, юунаас болж зодолдсон, ямар хохирол учирсан нь тодорхойгүй байсан юм.

Тэгвэл Элч.мн сайт "Засгийн газрын танхимын гурван сайд зодолдсон хэрэг саяхан гарчээ. Тодруулбал, ХЗДХ-ийн сайд Б.Энхбаяр, Батлан хамгаалахын сайд Д.Батлут, Эрүүл мэндийн сайд Ж.Чинбүрэн нар маргалдаж улмаар зодолдож биенээ хүнд гэмтээжээ.

Батлан хамгаалахын сайд Д.Батлутын нуруу хугарч, мэс засалд орсон бол ХЗДХ-ийн сайд Б.Энхбаярын гар, Ж.Чинбүрэн сайдын эгэмний яс хугарсан байна.

ХЗДХ-ийн сайд Б.Энхбаяр энэ даваа гаригт улс төрийн мэдэгдэл хийнэ гэсэн хэдий ч тэрбээр "Хоолой өвдсөн" хэмээн жиргэж, мэдэгдлээ цуцалсан болохоо битүүхэн илэрхийлсэн нь үнэн хэрэгтээ хоолой нь өвдсөн бус зодолдож гараа гэмтээсэнтэй холбоотой байж.

Түүнчлэн Эрүүл мэндийн сайд өчигдөр гар нь сойлттой явж байсан нь ийм учиртай байжээ" хэмээн мэдээлжээ.

Эх сурвалжуудаас уг асуудлыг тодруулахад, мэдээллийг үгүйсгэх, бас нотлох нэгэн алга. Хэдий ийм ч түшээдийн өнгөрсөн өдрүүдийн үйлдэлд анализ хийж үзвэл ням гаригт болсон Засгийн хуралдаанд дээрх гурван гишүүн оролцоогүй гэсэн шуум байна.

Мөн Б.Энхбаяр сайд даваа гаригт мэдэгдэл хийх байсан ч сураггүй болсон, Ж.Чинбүрэн сайд гар нь сойлттой олны өмнө гарч мэдэгдэл хийсэн, Д.Батлут сайд Гэмтлийн эмнэлэгт хандсан зэрэг нь хардлагыг лавшруулж байгаа юм. Удахгүй нэр холбогдсон сайд нар асуудалд байр сууриа илэрхийлж үнэн, худалд цэг тавих буй за.