АНУ-ын ерөнхийлөгч Дональд Трамп Цагаан ордны Зууван танхимд сэтгүүлчдэд “Би ОХУ-ын ерөнхийлөгч Владимир Путин надад хэлсэн зүйлээ хийж, гэрээний үүргээ биелүүлэх болно гэж би бодож байна.

Би Оросын газрын тосонд хоёрдогч татвар оногдуулахыг хүсэхгүй байгаа ч Украины нөхцөл байдлыг зохицуулахад Оросууд ахиц дэвшил гаргахгүй бол ингэхээс өөр аргагүй болно. Би ийм татварыг Венесуэл улсад оногдуулсан” гэж мэдэгдээд байсан билээ.

Тэгвэл өчигдөр Харьков хотын дарга Игорь Терехов “Оросын цэргүүд манай хот руу дроноор довтолж, Холодногорск дүүрэгт түймэр дэгдсэн” гэж мэдээлсэн бол Запорожье мужийн захиргааны тэргүүн Иван Федоров “Оросууд дроноор Запорожье мужийн сууринд цохилт өгсний улмаас манай нэг иргэн нас барсан” гэж мэдэгдэв. Харин Оросын Гадаад Хэргийн сайд Сергей Лавров “Бид Украины эрчим хүчний дэд бүтцийн байгууламжид цохилт өгөхөөс татгалзсан.

Киев энэ тохиролцоог биелүүлэхгүй байна. Москва Украины халдлагад өртсөн Оросын эрчим хүчний байгууламжийн жагсаалтыг АНУ-д өгсөн” гэж мэдэгдэв. Тэгвэл Украины Гадаад хэргийн сайд Андрей Сыбига “Путин Трамптай ярилцахдаа Украины эрчим хүчний байгууламжид цохилт өгөхөө зогсоосон гэсэн амлалтаа Орос биелүүлэхгүй байна” гэж мэдэгдэв.

Эдгээр мэдээний дараа Бүгд Найрамдах намыг дэмждэг, Цагаан ордон дахь Fox News агентлагийн сурвалжлагч Жеки Хайнрих өөрийн X хуудсанд “Ерөнхийлөгч Трамп Орос Украинд иж бүрэн гал зогсоох хэлэлцээрийг удаашруулж байгаад нь Путинд сэтгэл дундуур байна. Иймээс ерөнхийлөгчийн засаг захиргаа цаашид гэрээг хэрхэн хэрэгжүүлэх талаар хэлэлцэж, тэр дундаа Оросын “сүүдрийн флот”-ын эсрэг шийдэмгий хориг арга хэмжээ авах боломжтой гэж үзэж байна.

Тэд надад “Одоо 10-аас гурав орчим оноо авч байгаа хориг арга хэмжээг хэрэгжүүлэх ажлыг чангатгаж, Балтийн тэнгисээр хууль бусаар газрын тос тээвэрлэх Оросын “сүүдрийн флотыг” тасалдуулах нь Путинд үзүүлэх дарамт шахалтын хамгийн хялбар арга байх болно” гэж мэдээлэв. Оросын хууль бус газрын тосны борлуулалтын 70 хувь нь “сүүдрийн флот” ашиглан хийгддэг” гэж бичсэн байна.

Энэ үеэр ерөнхийлөгч Зеленский Киевт, Украинд арван нэг дэх удаагаа айлчилж байгаа ХБНГУ-ын Гадаад хэргийн сайд Анналена Бербоктой хамтран хэвлэлийн бага хурал хийж “Манай цэргийн баг энэ баасан гаригт цэргийн бүрэлдэхүүнээ манай улсад байрлуулах улсуудын цэргийн удирдлагатай уулзалт хийнэ. Бид энэ уулзалтаас илүү тодорхой шийдвэр хүлээж байна” гэж мэдэгдэв.

Германы Гадаад хэргийн сайд Бербок “Манай улс Украинд богино хугацааны тусламж болгон нэмж гурван тэрбум евро, 2029 он хүртэл цэргийн дэмжлэг үзүүлэх зорилгоор 8.25 тэрбум евро олгох шийдвэр гаргасан. Энэ нь Германы дараагийн засгийн газар Киевт томоохон дэмжлэг үзүүлсээр байх болно гэдгийн баталгаа юм.

Герман улс Үндсэн хуульдаа түүхэн нэмэлт өөрчлөлт оруулсан нь бид Украин болон Европын аюулгүй байдлыг үргэлжлүүлэн дэмжих талаар шийдвэр төгс байгаагийн тод илрэл” гэж хэлэв. Тэгвэл өчигдөр ХБНГУ-ын Хууль зүйн яамны хүсэлтээр Европын парламент нууц санал хураалт явуулж, барууны популист Германы төлөөх альтернатив намын гишүүн, Путиныг дэмжигч Петр Быстрон гишүүний халдашгүй эрхийг цуцлав.

Мөн Германы Сангийн яамны төлөөлөгч “Германы гаальд хураагдсан Оросын газрын тосны “сүүдрийн флот”-ын “Eventin” хөлөг онгоцыг Герман улс төрийн ашиг тусын тулд нефтийг нь улсын орлого болгож, уг хуучирсан хөлгийг устгах болно” хэмээн мэдэгдэв. Уг хөлөг 40 сая еврогийн үнэ бүхий 100 мянган тонн түүхий нефтийг тээвэрлэж явсан юм байна.

Мөн НАТО-гийн зүүн жигүүрийг бэхжүүлэх зорилгоор Германы зэвсэгт хүчний таван мянган цэрэг бүхий 45 дугаар танкийн бригадыг Литва улсад албан ёсоор байршуулав. Энэ нь дэлхийн хоёрдугаар дайнаас хойш Германы цэргийг гадаад улсад байршуулсан анхны тохиолдол болов.

Ийнхүү барууны улс төрийн үйл явц өдөр өдрөөр эрчимжиж байна.

Г.АМАРСАНАА