Авлигатай тэмцэх газрын шаардлагын дагуу түрээсийн мопед, скүүтерийн үйл ажиллагаатай холбоотой нийслэлийн Засаг даргын 2026 оны А/387, А/552 дугаар захирамжийг 2026 оны зургадугаар сарын 2-ны өдрийн А/820 дугаар захирамжаар хүчингүй болголоо. Авлигатай тэмцэх газраас түрээсийн мопед, скүүтерийн үйл ажиллагаанд хяналт тавьж, хууль тогтоомжид нийцүүлэх зорилгоор холбогдох албан бичгийг нийслэлийн Засаг даргад хүргүүлсэн байна.

Тус албан бичигт зорчих чиглэл, замын маршрутыг тодорхой болгох, зөвшөөрлийн асуудлыг Зөвшөөрлийн тухай хуульд нийцүүлэх, 18 нас хүрээгүй иргэд ашиглах боломжийг хязгаарлах, явган хүний замаар зорчуулахгүй байх техникийн шийдэл нэвтрүүлэх, бүртгэлжүүлэх, замын хөдөлгөөний аюулгүй байдлыг бүрэн хангах зэрэг шаардлагыг тусгажээ.

Дээрх нөхцөл, шаардлагыг бүрэн хангаж, холбогдох хууль тогтоомжид нийцүүлсний дараа түрээсийн мопед, скутерийн үйл ажиллагааг үргэлжлүүлэхээр болсон байна.