Ховд аймагт хэрэгжиж буй томоохон төслүүдийн нэг нь Эрдэнэбүрэнгийн усан цахилгаан станц барих төсөл юм. Уг төслийн бүтээн байгуулалт удахгүй эхлэх юм байна.

Үүнтэй холбогдуулан өчигдөр Пауэр Чайна-Монгол Улс Эрдэнэбүрэн усан цахилгаан станц төслийн ерөнхий менежер Xu Shenfei болон албаны бусад төлөөлөл Ховд аймгийн удирдлагуудтай уулзжээ.

Энэхүү уулзалтын үеэр талууд төслийн бүтээн байгуулалтыг эрчимжүүлэх болон хамтын ажиллагааны бусад асуудлаар ярилцсан байна.

Станцын бүтээн байгуулалтад орон нутгаас ажилтан авах, хүнсний хангамж бараа материалыг орон нутгаас худалдан авч аж ахуйн нэгжийг дэмжих, орон нутгийн компаниудаар тээвэрлэлт хийлгэх зэрэг санал уламжилжээ.

Төслийн ерөнхий менежерийн танилцуулснаар, бүтээн байгуулалтын ажлын үеэр талбайд 700-800 хүн ажиллана гэж тооцсон байна. Хүнсний хангамж болон ажилтны дийлэнхийг орон нутгаас авахаар төлөвлөж байгаа аж.

Ингэхдээ сурган, дадлагажуулах юм байна. Хамгийн гол нь тогтвор суурьшилтай ажиллах нь чухал бөгөөд шаардлагатай ачаа, техник тоног төхөөрөмж тээвэрлэх хэрэгцээ өндөр байгаа тул шаардлага хангасан компанитай хамтран ажиллахад бэлэн буйгаа илэрхийлжээ.

Цаашид талуудыг оролцуулсан уулзалт зохион байгуулж, хамтын ажиллагаа, зарим тулгамдсан асуудлыг тухай бүрд нь ярилцаж шийдвэрлэхээр болсон байна.

Б.ЖАРГАЛ