2018 оны 12 дугаар 04-нд банкууд ам.долларыг 2644-2648 төгрөгөөр худалдан авч, 2650-2660 төгрөгөөр худалдаж байсан бол одоогоор (2018/12/06-ны өдрийн байдлаар) ханш даруй 16-17 орчим төгрөгөөр буураад байна.

Сүүлийн өдрүүдэд гадаад валютын ханш эрчимтэй өссөн нь нүүрсний экспорт саатсанаар валютын орох урсгал буурна гэсэн хүлээлт үүссэн, гадаад зах зээлд ам.долларын ханш чангарч байгаа, баяр ёслолын улирал дөхөж валютын эрэлт өссөн зэрэг олон хүчин зүйлс давхацсанаас шалтгаалсан хэмээн мэргэжилтнүүд үзэж байна.

Харин Монголбанкны веб сайтад өнөөдөр гарсан мэдэгдлээс үзэхэд төв банк төгрөгийн ханш хурдтай суларч байгаагийн эсрэг цөөнгүй арга хэмжээ авч хэрэгжүүлснээр ханшийн хэлбэлзлийг бууруулж чадсан гэжээ. Тухайлбал, Монголбанкнаас 2018 оны 2 дугаар хагаст 1 тэрбум долларыг банкуудад худалдсан, үүнээс 11 дүгээр сар гарснаас хойш хугацаанд 375 сая ам.долларыг худалдсан байна. Төв банк валют зарахаас гадна бодлогын хүүг нэмэгдүүлэх, валютын зээл олгох сонирхлыг хязгаарлах, валютын эрэлт үүсгэдэг хэрэглээний зээлийн өсөлтийг сааруулахад чиглэсэн арга хэмжээг аваад байгаа юм байна.

Мөн Монгол Улсын нийт нүүрсний экспортын тал хувийг бүрдүүлдэг Өмнөговь аймгийн Гашуунсухайт хилийн боомтоор нэвтрэх нүүрсний экспорт 11 дүгээр сарын дунд үеэс эхлэн саатаад байсан бол Өмнөговь аймгийн Засаг дарга Н.Наранбаатарын мэдээлж буйгаар БНХАУ-ын тал хилийн шалган нэвтрүүлэх орц, гарцад технологийн шинэчлэл хийх ажил дуусах шатандаа орж байгаа бөгөөд хилээр гарж буй нүүрсний экспортын хэмжээ нэмэгдэж байгаа, удахгүй хэвийн хэмжээнд хүрнэ гэсэн хүлээлттэй байна хэмээн мэдэгдээд байна. Тодруулбал Гашуунсухайт боомтоор нэвтрэх тээврийн хэрэгслийн хэмжээ 11 дүгээр сард өдөрт 1 хүртэл саараад байсан бол одоогоор 400-500 машин өдөрт нэвтэрч байгаа юм байна. Ингэснээр валютын орох урсгал их хэмжээгээр буурахааргүй болж, энэ хэрээр ханшид ирж болзошгүй дарамт багасах ажээ.

Дээрх мэдээллүүдийг дүгнэж хэлэхэд ноён долларын ханш сүүлийн өдрүүдэд хурдтай өсч байсан явдал намжих бодит нөхцөл бүрдсэн гэж үзэж болохоор байна.