2017 оны 10 дугаар сарын 31-ний өдөр хичээлийнхээ танхимд ангийн хөвгүүндээ өшиглүүлсэнээс болж зүүн өвдөгний тойг нь мултарч 15 сарын турш алхаж чадахгүй, тэргэнцэр дээр сууж байсан Г.Ботажан охин хөл дээрээ боссон сайхан мэдээг дуулгаж байгаадаа баяртай байна. Охиныг өвдөгөө бэртээснээс хойш яг нэг жилийн дараа /2018.10.31/ өмгөөлөгч Г.Баасан, ээж М.Гүлсекер нар хэвлэлийн хурал зарлаж “Монгол Улсад хагалгаанд орох боломжгүй Солонгос улсад эмчлүүлэхэд 60 сая төгрөг шаардлагатай байна” хэмээн монголын ард түмнээс дэмжлэг хүсч байлаа.

Хэвлэлийн хурлын дараа өрнүүлсэн хандивын дансанд монголын ард түмэн Г.Ботажан охинд сэтгэлийн өглөг болгон 11 сая 758 мянга 890 төгрөг өгсөн байдаг. Солонгос улс руу явах эмчилгээний зардал бүрдээгүй байхад охины өвдөгний гэмтэл даамжирч ахиад ганцхан сар л болоход хөлөө тайруулах эрсдэл тулгарсан юм. Тиймээс өөр улсад хямд өртөгөөр эмчлүүлэх боломжийг хайж байх цаг үед олон улсад эрүүл мэндийн аялал жуулчлалын “Глобал Медикал Тур” ХХК-ийн ерөнхий захирал Ө.Мухтар Турк улсад эмчлүүлэхээр болсон юм. Бид түүнтэй онлайнаар холбогдож Г.Ботажан охинтой хамгийн анх хэрхэн холбогдсон, хагалгааны үр дүнгийн талаар тодруулга авснаа хүргэж байна.

-СОЛОНГОС УЛСААС 4-5 ДАХИН ХЯМД ҮНЭЭР Г.БОТАЖАН ОХИНЫГ ТУРКТ ЭМЧЛҮҮЛЖ ХӨЛ ДЭЭР НЬ БОСГОЛОО-

-Сайн байна уу, Г.Ботажан охин маань танай хамт олны ачаар Турк улсад эмчилгээ xийлгэж дахин хөл дээр нь боссон сайхан мэдээг дууллаа. Тэдэнтэй хамгийн анх яаж холбогдож байв?

-Сайн байна уу. Манай “Глобал Медикал Тур” ХХК нь эрүүл мэндийн аялал жуулчлалын чиглэлээр үйл ажиллагаа явуулдаг юм. Монгол болон бусад гадаадын орноос өвчтөн хүлээн авч Турк улсад чанартай, хямд өртөгөөр эмчлүүлэх боломжийг олгодог юм. Бид Г.Ботажан охины нөхцөл байдлыг олон нийтийн сүлжээгээр өрнөж буй хандивын аян болон хэвлэл мэдээллийн хэрэгслээр дамжуулан Солонгос улсад 60 сая төгрөгөөр эмчлүүлэх гэж байгааг мэдэж авсан.

Ингээд охины ээж М.Гүлсекертэй холбогдож Турк улсад илүү боломжийн үнээр, өөрөөр хэлбэл Солонгос улсаас 4-5 дахин хямд үнээр эмчлүүлэx боломжтойг дуулгасан. Г.Ботажан охин Турк улсад ирж эмчлүүлэн богино хугацаанд хөл дээрээ зогсож чаддаг болсон манай хамт олон их баяртай байгаа.

-15 сарын турш алхаж чадахгүй, тэргэнцэр дээр сууж байсан Г.Ботажан охины маань эмчилгээ амжилттай болж эдгэрлээ. Ээж охин хоёр хэзээ монголдоо ирэх вэ?

-Г.Ботажан охин болон ээж М.Гүлсекер нарын Монгол руу буцах хугацаа одоогоор тодорхой бус байгаа.

-Г.Ботажан охины онош Монголд байхдаа тодорхой бус байсан. Өвдгөндөө ямар гэмтэл авсны улмаас алхаж чадахгүй байв?

-Охин нэгдүгээр сарын 29-ны өдөр Турк улсад ирсэн. Охиныг ирмэгц эмч нар нэн түрүүнд өвдөгний гэмтлийг үзэж оношлосон. Тус оношоор бол охины зүүн өвдөгний (meniscus) минискус нь сэдэрсэн буюу урагдсан гэсэн оношоор яаралтай хагалгаанд орсон. Хагалгааны дараа долоо хоног хэвтэн эмчлүүлсэний дараа 17 удаагийн физик эмчилгээ хийлгэсэнээр өнөөдөр охины биеийн байдал маш сайн байгаа. Одоо өөрөө чөлөөтэй алхаж гүйдэг болсон.

-Монголд ирээд үргэлжлүүлэн эмчилгээ хийлгэх шаардлагатай юу?

-Г.Ботажан охины эмчилгээ бол бүрэн дууссан. Монголд очоод ямар нэгэн эмнэлгийн байгууллагаар эмчилгээ хийлгэx шаардлагагүй. Зөвхөн өөрөө гэрээр дасгал хөдөлгөөн хийж, удаан хугацаанд хөдөлгөөнгүй, хүчгүй болсон зүүн хөлийг баруун хөлийн адилаар идэвхтэй xөдөлгөөнд оруулаx хэрэгтэй гэж эмч зөвлөсөн байгаа.

-Г.Ботажанаас ярилцлага авах гээд очиход гэнэтхэн алхаж чаддаггүй болчихсон учраас сэтгэлээр нэлээд унасан байсан. Хагалгааны дараа алхаж эхлэх үедээ тантай сэтгэгдлээ хуваалцсан уу?

-Тиймээ, охины хагалгаа болон эмчилгээ хийж дуусах хүртэл нь манай байгууллага охин, ээж хоёрын хажууд байж чадах чинээгээрээ дэмжлэг туслалцаа үзүүлсэн. Охин алхаж эхлэх үеийн сэтгэгдлээ бид нартай хуваалцаж, эмчилгээ хагалгааны үеийн сэтгэлд үлдсэн дурсамжуудаа, талархсан сэтгэлээ зургаар илэрхийлж, манай хамт олон болон эмч нарт дурсгасан. Г.Ботажан охин маш ухаантай, сэргэлэн цовоо охин. Манай хамт олон болон Турк улсын “Эрдэм” эмнэлгийн турк эмч нар охиныг бүрэн эдгэж, алхдаг болсонд нь маш их баяртай байгаа. Мөн Г.Ботажан охинд гүн туслалцаа үзүүлсэн сайхан сэтгэлт Монголын нийт ард түмэндээ, Истанбул хотод суугаа Ерөнхий Консулын газapт гүн таларxал илэрxийлж ажлын өндөр амжилт xүсэж байгаагаа танай сайтаар дамжуулан хэлье.

-Бидний xүсэлтийг xүлээн авч мэдээлэл өгсөнд баярлалаа. Олон орны мянга мянган ард түмэнд амьдрал бэлэглэдэг шилдэг xамт олон болоx сайxан ерөөлийг дэвшүүлье?

-Баярлалаа. Та бүxэнд бас ажлын амжилт xүсье.

-МОНГОЛД ИРЭХЭЭРЭЭ ХАМГИЙН ТҮРҮҮНД ӨМГӨӨЛӨГЧ Г.БААСАН ЭГЧ ДЭЭРЭЭ ОЧИЖ “БАЯРЛАЛАА” ГЭЖ ХЭЛНЭ-

Бид охины эмчилгээний талаарх мэдээллийг авсныхаа дараа ээж охин хоёртой онлайнаар холбогдож сэтгэгдэлийг сонсож, монголын ард түмэнд дамжуулсан талархалын үгийг нь дамжуулж байна.

Г.Ботажан: “Би алхаж, гүйж чаддаг болсон. Монголд очихоороо хамгийн түрүүнд өмгөөлөгч Г.Баасан эгч дээрээ очиж “баярлалаа” гэдгээ хэлнэ. Гэртээ хэвтдэг байхдаа ангийнхаа хүүхдүүдтэйгээ хамт хөөцөлдөж гүйх юмсан гэж байнга боддог байсан. Одоо мөрөөдөл маань биелэсэнд маш их баяртай байгаа. Би том болохоороо надад тусласан бүх хүмүүстээ туслана ачийг нь мартахгүй хичээлдээ сайн сурах болно” гэв.

Охины ээж М.Гүлсекер: “Монголын ард түмэн бид хоёрт туслаагүй бол миний охин хөл дээрээ дахин босохгүй байсан. Ботажан охины минь биеийн байдал маш сайн байгаа. Өөрөө чөлөөтэй алхаж, гүйдэг болсонд миний бие маш их баяртай байна. Охин маань ангийнхаа найзуудтайгаа уулзаж сургуульдаа явна гээд их баярлаж байгаа. Монголд очихоороо физик эмчилгээ сайн хийлгэхгүй бол хагалгаа хийсэн хөл нь сайн эдгэрэхгүй гэж эмч нь хэлсэн. Охиныхоо хөлийг сайн эдгэсний дараа хичээлд нь явуулна даа. Охиныг маань хөл дээр нь босоход маш олон хүн тусласан. Тиймээс танай сайтаар дамжуулан талархсан сэтгэлээ илэрхийлмээр байна. Нэн тэргүүнд Турк улсад богино хугацаанд эмчилгээ хийлгэх боломжийг олгож түргэн шуурхай, чанартай үйлчилгээ үзүүлж, чин сэтгэлээ зориулан цаг алдалгүй тусламж үзүүлсэн ”Глобал Медикал Тур” ХХК-ны хамт олон, ерөнхий захирал Ө.Мухтар, гүйцэтгэх захирал М.Адилбек, Дотрын нарийн мэргэжлийн эмч Ш.Имантай, Е.Бөкен дүү нартаа дахин, дахин баярлалаа гэж хэлмээр байна. Хэрэв дүү нар маань ингэж туслаагүй бол охин маань хөлөө алдах байсан. Гэр бүл хүүхэд залуучуудын хөгжлийн газар, 33 дугаар сургуулийн хамт олон, охиныхоо ангийн найзуудад, эцэг, эхчүүдэд нь, Баян-Өлгий аймгаас сонгогдсон УИХ-ын гишүүн Ж.Баделхан гишүүнд баярлалаа. Охины маань эмчилгээнд Истанбул хотод суугаа Ерөнхий Консулын газар 1500 ам.доллар хандивласан байгаа. Мөн К.Ерик, Көбеш нарт маш их баярлалаа. Мөн Баян-Өлгий аймгийн эмэгтэйчүүдийн холбоо, Логарифм бүрэн дунд сургуулийн “Дуду” эмээ цэцэрлэгийн хамт олондоо баярлаж талархсанаа дахин дахин илэрхийлье. 10 дугаар ангийг хамт төгссөн Ж.Акбота, Д.Ақмарал болон Казакстанд амьдарч байгаа найз нартаа охин бид хоёрыг тусалж дэмжсэнд маш их баярлалаа” хэмээн сэтгэгдлээ хуваалцлаа.