"Мобиком" корпораци байрны түрээсээ төлөлгүй таван сар болж, хөөгдөхөд хүрсэн үү”, “Мобиком-ын удирдлагуудыг АТГ-аас шалгахаар болжээ”, “Мобиком корпорацийг түрээсээ төлөхийг шаардаж, мэдэгдэл хүргүүллээ”, “Монгол, Японы хөрөнгө оруулалттай “Мобиком”-ын салбар компанийнхан шүүхэд дуудагдсаны учир” гэх агуулгатай нийтлэл нийгмийн сүлжээгээр тархаж, улмаар олон сайтууд түгээсэн байна. Энэ мэдээлэл хоёр талын байр суурийг хадгалаагүйн дээр хэт нэг талыг барьсан мэдээлэл байсныг Мобиком корпорацийнхан албан ёсоор мэдэгджээ.

“Мобиком Корпораци” ХХК нь “Монтрейд” ХХК-тай түрээсийн гэрээ байгуулаагүй бөгөөд дамжуулан түрээслэгч “Ньюком Проперти” ХХК-тай хөрөнгийн менежментийн гэрээтэй ажилладаг байжээ. “Мобиком Корпораци” ХХК нь хуулийн хүрээнд гэрээ хэлцэл хийж, үйл ажиллагаагаа явуулж байгаа бөгөөд ямар нэгэн гэмт хэрэгт тус компанийн удирдлага холбогдолгүй аж. Цаашид ямар нэгэн мэдээлэл түгээхдээ албан ёсны эх сурвалжтай, мэдээллийг тэнцвэртэй олон нийтэд түгээж байхыг тус компанийнхан санал болгож, хэвлэл мэдээллийн байгууллагатай хамтран ажиллахдаа таатай ханддагаа уламжилсэн юм.