Хятадад илэрсэн шинэ коронавирус хүнээс хүнд халддаг гэж БНХАУ-ын Эрүүл мэнд, ариун цэврийн асуудал хариуцсан Төрийн хорооны шинжээч Жун Наньшань нэгдүгээр сарын 20-нд буюу өчигдөр албан ёсоор зарласан. Сүүлийн хоёр хоногийн дотор Хятадад 139 хүн нэмж халдварлаж 198 болж гурван хүн нас барсан тухай http://vesma.today/ эх сурвалж мэдээлээд 20 цаг ч болоогүй байна. Гэтэл уг шинэ төрлийн вирусаар өвчилсөн хүний тоо өдгөө 218-д хүрч, хүрээгээ тэлэв. Халдвар зөвхөн БНХАУ-ын нутаг дэвсгэр дээр бус, цаашлаад Тайланд, Хонг-Конг, Япон, Өмнөд Солонгост хүртэл бүртгэгджээ.

Үүний өмнө тус вирусыг амьтны гаралтай тул хүнээс хүнд халдварлах магадлал нь бага хэмээн үзэж байсан бол, БНХАУ-ын Засгийн газраас томилсон судалгааны баг Ухань хотоос анхлан дэгдсэн коронавирусыг хүнээс хүнд халдварладаг болохыг тогтоосон. Аажмаар эмнэлгийн ажилтнууд өөрсдөө өвдөж эхэлснээр уг дүгнэлтийг хийх үндэслэл болжээ. Өвчтөнүүдтэй гардан ажиллаж байсан эрүүл мэндийн байгууллагын 14 ажилтан халдвар авсан мэдээ байна. Байдал ийм дээрээ тулаад байгаа учраас Хятадад тархаад буй коронавирусын халдвартай холбогдуулж Дэлхийн Эрүүл Мэндийн Байгууллага ДЭМБ-аас шуурхай хуралдаан зарласан байна. Хуралдаан маргааш болох бөгөөд үүгээр олон улсын эрүүл мэндийн аюулгүй байдал эрсдэлд орсон эсэх талаар ярилцана гэж Ройтерс агентлаг мэдээллээ.

Амьтны гаралтай гэгдэж байсан тус вирусыг хүнээс хүнд халдварладаг болохыг Хятадын Засгийн газар нэгэнт зарласан. Яг одоогийн байдлаар мэдэгдэж буй өвчлөгсдийн тоо 222-т хүрээд байгаа ч ДЭМБ-ын зүгээс худалдаа, аялал жуулчлалын хөдөлгөөнийг хязгаарлах шийдвэрийг хараахан гаргаагүй байна. Хурдацтай тархаж байгаа энэ шинэ өвчин дэлхийг цочроож эхлээд байхад бид улирлын чанартай ханиадандаа дарагдаад урд хөршөө анхаарах ч завгүй сууцгаана. Уханиас Өмнөд Солонгост хүрч чадсан юм чинь манайд ороод ирэх юухан байхав дээ. Заавал орж ирээд байх ч албагүй. Бид очоод чирээд ирнэ л дээ. Одоо чинь цагаан сар хаяанд тулчихаад наймаачид урд хөршийг зорьж байгаа оргил цаг нь. Цагийн байдлыг харж байгаад Цагаан сар өнгөртөл урд хилийг түр хаахгүй бол нөгөө даамжирч буй үл таних өвчинг импортлоод ирэх вий. Бид хэдүүлээ билээ.

Энэ жилийн ханиадыг эдгэж өгөхгүй ужиг байна, дороо хүндэрч шууд хатгалгаа болоод байна, эмнэлгүүд ачааллаа даахаа болилоо гээд дээр дооргүй шуугиж байгаа. Ханиаднаас яаж салах арга асуусан хүмүүс сошиал ертөнцөөр дүүрэн. Сурагчдын амралт дөнгөж дуусаад хичээлдээ ороод л хүүхдүүд шинээр ханиад аваад ирж байна. Ийм нөхцөл байдалд их анхааралтай хандахгүй бол коронавирус ороод ирвэл яах вэ. Чухам айдас энэ л байна.