Сонгуулийн санал хураалттай холбоотойгоор иргэдийн шилжилт хөдөлгөөнийг хоёрдугаар сарын 1-нээс түр зогсоохоор УИХ-ын Сонгуулийн тухай хуулиар хуульчилсан. Тухайлбал, 2020 оны хоёрдугаар сарын 1-нээс сонгууль болсны дараах өдрийн 00:00 цаг хүртэл Иргэдийн засаг захиргааны нэг нэгжээс нөгөө нэгжид шилжин суурьших хөдөлгөөнийг түр зогсоох юм. Энэ хугацаанд аймаг нийслэл, сум хороодын хооронд иргэдийн шилжилт хөдөлгөөнийг бүртгэхгүй. Харин сонгуулийн саналт хураалтын маргаашнаас шилжилт хөдөлгөөн хэвийн болно гэсэн үг юм. Тиймдээ ч энэ удаагийн Сонгуулийн тухай хуулийг “Царцааны нүүдэл”-ийг хязгаарлагдсан хууль боллоо гэлцэж байсан. Гэтэл царцаа нүүсээр байна.

Сонгуулийн саналаа нэг нэр дэвшигчийн төлөө өгөхийн тулд өөр нутаг оронд зохион байгуулалтайгаар олноороо шилжихийг “Царцааны нүүдэл” гэж нэрлэдэг. УИХ-ын 2016 оны сонгуулиар “Царцааны нүүдэл” хамгийн их явагдсан юм. “Царцааны нүүдэл”–ийг Увс аймагт 3300 сонгогч шилжсэнээрээ тэргүүлсэн бол Хөвсгөл аймагт 2985 сонгогч, Баянхонгор аймагт 2261 сонгогч шилжиж, Архангай аймагт 1341 сонгогч тус тус нэмэгдсэн гэдэг.

Ийм нүүдэл Улаанбаатар хотод ч явагдсан. Нэг дүүргээс нөгөөд шилжин очих нь ердийн үзэгдэл байсан. Одоо ч нүүж байна. Тодруулбал, Говь-алтай аймаг руу 200, Баянхонгор аймаг руу 1650, Сонгинохайрхан дүүрэг рүү 11650, Увс аймаг руу мөн их хэмжээний сонгогч “царцаа” нүүжээ.