Авлигатай тэмцэх газарт шалгагдаж байгаа авлига албан тушаалтай холбоотой хэргүүдээс хэд хэдэн хэргийг шүүхэд шилжүүлэх саналтай прокурорт шилжүүлжээ. Эдгээр хэргүүдийн тоймлон хүргэж байна.

М.ЭНХСАЙХАНД ХОЛБОГДОХ ХЭРГИЙГ ШАЛГАЖ ДУУСЧЭЭ

АТГ-аас Ерөнхий сайд асан М.Энхсайханыг Тавантолгойн төслийн Ажлын хэсгийг ахалж байхдаа эрх мэдэл, албан тушаалын байдлаа урвуулан ашигласан байж болзошгүй гэх үндэслэлээр яллагдагчаар татан шалгаж байгаа билээ.Түүнийг өнгөрсөн оны зургаадугаар сард ШШГЕГ-ын харьяа Цагдан хорих 461 дүгээр ангид саатуулж шалгасан ч сулласан байгаа. Тэгвэл Ерөнхий сайд асан М.Энхсайханд холбогдох хэргийг шалгаж дуусч, АТГ-аас түүнд холбогдох хэргийг шүүхэд шилжүүлэх саналтайгаар прокурорт шилжүүлжээ.

Н.НОМТОЙБАЯРЫН ХЭРГИЙГ ШҮҮХЭД ШИЛЖҮҮЛЭХ САНАЛТАЙ ПРОКУРОРТ ХҮРГҮҮЛЖЭЭ

УИХ-ын гишүүнийхээ бүрэн эрхээс өөрийн хүсэлтээр түдгэлзсэн Н.Номтойбаярыг хуулийн байгууллагаас Эрүүгийн хуулийн ерөнхий ангийн 3.7 дугаар зүйлийн 1 дэх хэсэгт заасныг журамлан тусгай ангийн 22.1 дүгээр зүйлийн 3 дахь хэсэгт зааснаар “Улс төрд нөлөө бүхий этгээд эрх мэдэл, албан тушаалын байдлаа урвуулан ашиглах” гэмт хэрэгт эрүүгийн хэрэг үүсгэн яллагдагчаар татан шалгаж байгаа билээ. Улмаар өнгөрсөн нэгдүгээр сарын 31-нд Хан-Уул дүүргийн Эрүүгийн хэргийн анхан шатны шүүхийн шийдвэрээр Н.Номтойбаярт хилийг хориг тавьсан байдаг. Тэгвэл хуулийн байгууллагаас Н.Номтойбаярт холбогдох хэргийг шалгаж дуусчээ. Түүнд холбогдох хэргийг шүүхэд шилжүүлэх саналтайгаар прокурорт хүргүүлжээ.

“УЛААНБААТАР ДУЛААНЫ СҮЛЖЭЭ” ТӨХК-ИЙН ЗАХИРАЛ АСАН Д.БЯМБА-ОЧИРЫН ХЭРГИЙГ ПРОКУРОРТ ШИЛЖҮҮЛЖЭЭ

“Улаанбаатар дулааны сүлжээ” ХК-ийн гүйцэтгэх захирал асан Д.Бямба-Очирыг эрх мэдэл албан тушаалаа ашиглаж, бусдаас 500 сая төгрөгийн хахууль авсан гэх үндэслэлээр АТГ-ын мөрдөн шалгах хэлтсийн мөрдөгчид өнгөрөгч аравдугаар сард гэрээс нь баривчилж, саатуулан шалгасан байдаг. Д.Бямба-Очир нь 2016 оны сүүлчээс “Улаанбаатар дулааны сүлжээ” ТӨХК-ийн захирлаар томилогдон ажилласан боловч тухайн албан тушаалыг ердөө хоёрхон жил хашаад ийнхүү баривчлагдсан. Тэгвэл Д.Бямба-Очирт холбогдох хэргийг АТГ-аас шалгаж дуусаад прокурорт шилжүүлжээ.

Дашрамд дурдахад, Д.Бямба-Очир 2016 оны хөрөнгө орлогын мэдүүлэгтээ, жилийн орлого 78 сая, гэр бүлийн гишүүдийн орлого 668 сая, нэг тэрбум 300 сая төгрөгөөр үнэлэгдэх зургаан орон сууц, барилга байгууламжтай, 180 сая төгрөгийн үнэтэй Лексус-570 автомашинтай, нэг тэрбумын хадгаламжтай гэж мэдүүлжээ.

ЗТХ-ИЙН САЙДААР АЖИЛЛАЖ БАЙСАН Д.ГАНБАТЫГ ШҮҮХЭД ШИЛЖҮҮЛЭХ САНАЛТАЙГААР ПРОКУРОРТ ХҮРГҮҮЛЖЭЭ

Зам, тээврийн хөгжлийн сайдаар ажиллаж байсан Д.Ганбатыг АТГ, ЭЦА-ны хамтарсан ажлын хэсгийнхэн өнгөрөгч аравдугаар сард албан тушаалаа урвуулан ашиглаж, бусдаас хээл хахууль авсан байж болзошгүй хэрэгт холбогдуулан цагдан хорьсон билээ. Д.Ганбат өмнө нь Худалдаа хөгжлийн банк, “Монголын зэс”-ийн удирдлагын холбогдсон хэрэгт хамжигчаар оролцсон хэмээн яллагдагчаар тооцсон байдаг. Тодруулбал, Сэлэнгэ аймгийн Хүдэр сумын нутагт орших Төмөртэйн төмрийн хүдрийн орд газраас тус аймгийн Ерөө сум дахь Хандгайт өртөө хүртэл 33.4 км төмөр зам концессоор барьж, 2015 онд ашиглалтад оруулахад замын ажлын үнийн дүнтэй холбоотой баталгаажуулсан акт, дүгнэлт гараагүй, Сангийн, Зам, тээврийн яам, ТӨБЗГ, “Монголын төмөр зам” зэрэг байгууллагад ажлын гүйцэтгэлтэй холбоотой санхүүгийн баримт, тооцоог өгөөгүй байхад 112.66 сая ам.доллароор барьсан хэмээн тооцож улсад хүлээн авч хохирол учруулсан хэрэгт буруутгаж байгаа. Мөн Д.Ганбатыг “Эрдэнэт үйлдвэр”-т удирдах албан тушаал хашиж байхдаа их хэмжээний мөнгө завшиж, хөвгүүдийнхээ байгуулсан “Хатанболор”, “Дэвшилт” гэх компаниар дамжуулан өмнөд хөршөөс арматур оруулж ирэн, мөнгө угаасан байж болзошгүй гэх хэрэгт холбогдуулан шалгаж, түүний эзэмшлийн гэх “Өндөр буянт холдинг” компанийнх нь байранд нэгжлэг хийсэн билээ. Тэгвэл АТГ-аас Д.Ганбат холбогдох хэргийг шалгаж дуусаад шүүхэд шилжүүлэх саналтайгаар прокурорт хүргүүлжээ.

Ч.АЛТАНХУЯГ ХОЛБОГДОХ ХЭРГИЙГ АТГ-ААС ШАЛГАЖ ДУУСЧЭЭ

Эрүүл мэндийн даатгалын ерөнхий газрын дарга /ЭМДЕГ/ Ч.Алтанхуяг түүний удирдлага дор ажилладаг н.Баяраа нарыг Эрүүл мэндийн даатгалын сангийн чөлөөт үлдэгдлийг арилжааны банканд байршуулахдаа хүүгийн орлогыг хувьдаа завшсан байж болзошгүй гэх үндэслэлээр АТГ эрүүгийн хэрэг нээн, шалгаж байсан. Ч.Алтанхуяг нь 2017 оноос ЭМДЕГ-ын даргаар томилогдон ажиллаж байсан бөгөөд түүнээс өмнө НДЕГ-т удирдах албан тушаал эрхэлдэг байжээ. Тэгвэл Ч.Алтанхуяг холбогдох хэргийг АТГ-аас шалгаж дуусч, прокурорт шилжүүлжээ.

Дашрамд дурдахад, Ч. Алтанхуяг хөрөнгө орлогын мэдүүлэгтээ, 2018 онд 90 сая төгрөгийн орлого олсноо мэдээлжээ. Тэрээр таван орон сууц, зуслангийн нэг байшин, үйлчилгээний зориулалттай талбай, дөрвөн авто зогсоолтой, тэдгээрийг 845 сая төгрөгийн өртгөөр үнэлжээ. Мөн 54 сая төгрөгийн үнэлгээ бүхий газартай, 10 сая төгрөгийн үнэт зүйлтэй гэдгээ мэдүүлсэн байна. Дансандаа 194 сая, гадаад дансандаа 55 сая төгрөгтэй аж.