ЭМЯ-наас өнөөдөр 2020.03.03-ны өдрийн 11 цагаас шинэ төрлийн коронавирустэй холбоотой ээлжит мэдээллээ хийлээ.

ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл “Нийт 73 оронд шинэ төрлийн коронавирусын халдвар бүртгэгдсэн. Индонези, Армян, Тунис, Йордан, Сенегал зэрэг есөн оронд нэмэгдлээ. Сүрьеэ өвчин 69 хувиар буурсан байна. Томуу, томуу төст өвчний хувь буурлаа. Гэдэсний цусан суулга 1.2 хувиар буураад байна. Эмнэлгийн орны ачаалал хоёр хувиар буурсан үзүүлэлт гарсан. Хувийн ариун цэврээ сайн сахих юм бол халдварт өвчин багасах юм байна. ДЭМБ-аас өгч байгаа гол зөвлөмж бол гараа сайтар угаах, спиртээр ариутгах, амны хаалт зүүх гэдэг зөвлөмжийг өгч байна. Иргэд зөвлөмжийг маш сайн биелүүлж байгаа. Манай улсын хэмжээнд 335 хүн ажиглалтанд байна”

ДЭМБ-ын ажилтан О.Ариунтуяа “Өнөөдрийн байдлаар 64 улсад 1889 шинэ тохиолдол бүртгэгдсэн байна. Нийт тохиолдлын тоо болсон. Шинээр зургаан оронд халдвар бүртгэгдсэн. Нийт 38 улс 10-аас доош тохиолдолтой. ДЭМБ-ын мэдээллээр дэлхийн 64 улсад 24 цагийн дотор 1804 шинэ тохиолдол бүртгэгдэж, нийтдээ 88948 хүн өвчлөөд байна. Мөн шинээр 66 хүн нас барж, нийтдээ 3043 хүн амь насаа алдсан. Армен, Люксембург, Доминикан, Чех, Ислданд, Индонези улсад шинээр халдвар бүртгэгдсэн. Мөн сүүлийн үеийн хэвлэлийн мэдээгээр Португал, Иордан, Тунис зэрэг улсуудад халдвар бүртгэгдсэн талаар гарч байна. Хятад улсад 206 шинэ тохиолдол бүртгэгдсэн байна. Хубейд 42 нас баралт бүртгэгдсэн байна. Итали, БНСУ, Иран улсад голомтлон гарч байна. Иранд 66 хүн нас барсан. Өмнөд Солонгост 4812 тохиолдол нэмэгдсэн. АНУ-ын Вашингтон муж улсад зургаан хүн нас бараад байна. 130 улсад халдвар илрээгүй байгаа. Энэ дэгдэлтийг таслан зогсооход иргэн бүрийн үүрэг хариуцлага хамгийн чухал байгааг ДЭМБ сануулж байна. Нэгдүгээр сарын 6-аас хойш нийтдээ 810 хүнийг ажиглалтад авсан бөгөөд өнөөдрийн байдлаар 401 иргэнийг тусгаарлаж, хяналтад аваад байна. Мөн өнөөдөр өглөө буусан Турк-Улаанбаатар чиглэлийн онгоцоор буусан иргэдээс 16-г нь тусгаарлаж, хяналтад авсан бөгөөд үзлэг үргэлжилж байна”

ЭМЯ-ны Эмнэлгийн тусламжийн газрын дарга Буянжаргал “УОК-ын гарсан шийдвэрийн дагуу коронавирусын халдвар тархсан Итали, БНСУ зэрэг улс орноос иргэдийг онгоцонд хүлээж авахгүй байгаа. Хэрэв Италийн Милан, Солонгосын Дэгү хотоос ирэх хүн байгаа бол шууд ХӨСҮТ-ийн ажиглалт, тусгаарлалтад авч байгаа. Ямар нэгэн сэжигтэй зүйл ажиглагдах юм бол 100, 103 дугаарын утсанд холбогдож зөвлөгөө ав. Гэртээ сайн бүг. Зочин бүү урь. Гэртээ дасгал хөдөлгөөн сайн хий”

ХӨСҮТ-ийн захирал Д.Нямхүү “Тусгаарлагдсан таван тохиолдлоос коронавирус илрээгүй. Нийт 100 хүнийг ажиглалтад аваад хянаж байна” гэв.