Шуналаа дийлээгүй үе үеийн хотын удирдлагууд, тэднийг өөхшүүлэн хувь хүртэж цулайгчдын түрийвч нь зузааран гадаадад арал худалдаж авах хэмжээнд хүрсэн байлаа ч энгийн ард түмнийхээ амьдрах эрхээс таслан дээрэмдсэн аз жаргал нь хэр зэрэг амттай байхыг хожим түүх шүүнэ биз. Шахмал түлшний үйлдвэр орчмын айл өрхүүд аюултай хортой нөхцөлд амьдарч, тайван амгалан байх аргагүйддэгээ үе үе хэвлэлд мэдээлэлдэг. Тодорхой хэмжээнд үнэ хөлсөө төлөөд худалдаж авдаг шахмал нүүрсний чанар муу, нунтаг хог их гарч байгааг ч иргэд шүүмжилсээр байдаг.

Хамгийн гол нь эл түлшнээс тодорхой хувиар хамааран иргэд амь насаа алдах угаартах, гэр орон нь шатах тохиолдлууд бүртгэгдсээр байгаа нь анхаарахгүй орхиж болохгүй сэдэв төдийгүй эрх баригчдын сонгуулиар амласан утааг 70-80 хувь бууруулах зорилт нь 0 түвшинд үнэлэгдэхээр бодит байдалтай учраас асуудлын араас хариуцлага нэхэх шаардлага бий.

Монгол Улсын нийт хүн амын талаас илүү нь төвлөрөн амьдарч байгаа Улаанбаатар хотын агаарын бохирдлын асуудал нийгмийн хэм хэмжээнээс хальж үндэсний аюулгүй байдалд харшлах аюултай байдал руу аль хэдийн орсон боловч хүнлэг энэрэнгүй ёсыг уландаа гишгэсэн төрд шургалсан олигархи бүлэглэлүүд утааг бизнесийн боломж гэж харж асуудлыг ужгируулан, төсвийн олон тэрбумыг хий зувчуулан борчуудын амиар наадах ноцтой гэмт хэргийг үйлдэхдээ юман чинээнд тоогоогүйг хэзээ нэгэн цагт шүүх өдөр ирэх ба угаартаж нас барагсад, хэвлийдээ хордож буй ураг удмынхны амь насыг нэхэмжлэх цаг ойртжээ.

Улаанбаатар хотын агаарын бохирдол нь дулааны цахилгаан станц, автомашин, гэр хороолол болон бусад эх үүсвэрээс үүдэлтэй. Тодруулбал, дулааны цахилгаан станц 44.2, гэр хороолол 31, автомашин 16.1, бусад эх үүсвэр 8.7 хувийг бүрдүүлж байгаа юм. Үүнээс дулааны цахилгаан станцыг хасаад, үлдсэнийг нь 100 хувь гэж үзвэл, агаарын бохирдлын 55.6 хувийг гэр хороолол, 28.9 хувийг автомашин, 15.5 хувийг бусад эх үүсвэр эзэлж байна.

Иймээс гэр хорооллыг орон сууцжуулах, дэд бүтцийг цогцоор нь шийдвэрлэх асуудал нэн тэргүүний атал аль ч үеийн төр засгийн удирдлагууд зарцуулсан төсвийнхөө хэмжээнд мэдэгдэхүйц үр дүн гарган ажиллаж чадахгүй байдал бахь байдгаараа нь авлигалын сүүдэр туссаныг гэрчлэх болов уу.

Агаарыг бохирдуулагч нь тоосонцор, нүүрстөрөгчийн дутуу исэл, хүхэрлэг хий, азотын давхар исэл зэрэг юм. Үүнээс хамгийн их буюу тоосонцрын 52.3, азотын давхар ислийн 63.2 хувийг автомашин, нүүрстөрөгчийн дутуу ислийн 64.1 хувь, хүхэрлэг хийн 71.7 хувийг гэр хороолол бүрдүүлж буй. Агаарын бохирдол нь амьсгалын замын өвчлөлийн 53, уушгины хавдрын 40, хүүхдийн амьсгалын замын өвчлөл 24 хувийг бүрдүүлж байна.

Д.ЭНХБАТ