Парисын олимпын наадам өндөрлөхөд хоёрхон хоног үлдлээ. Өнөөдөр Монголын багаас гурван спортын төрөлд таван тамирчин өрсөлдөнө.

Тухайлбал эрэгтэйчүүдийн марафон гүйлтийн тэмцээнд гавьяат тамирчин, Монголын багийн тугч Б.Сэр-Од хурд сорих юм. Түүний уралдаан 14:00 цагаас эхлэх бол үргэлжлүүлээд чөлөөт бөхийн 62 кг-ийн жинд П.Орхон Болгарын Биляна Дудоватой 17:00 цагаас дагах барилдаан хүч үзнэ. Манай тамирчин "B" дэвжээний эхний барилдааныг хийх бол эрэгтэйчүүдийн 65 кг-ийн жинд Т.Тулга эхний даваанд дэлхийн хошой хүрэлтэй (2017, 2018) Кубын Алехандро Валдестай "А" дэвжээний дөрөв дэх, эмэгтэйчүүдийн 76 кг-ийн жинд Э.Даваанасан Нигерийн Анна Руебентай "B" дэвжээний найм дахь барилдаанаар дэвжээнд гарна.

Шигшээ барилдаан 00:15 цагаас эхэлж буй билээ.

Мөн энэ өдөр туйванчдын ганц төлөөлөл Монгол Улсын гавьяат тамирчин М.Анхцэцэг эмэгтэйчүүдийн 81 кг-ийн жинд 22:00 цагаас өргөж эхэлнэ.

ЭХ СУРВАЛЖ: IKON.MN