Ардчилсан намын Ерөнхий нарийн бичгийн дарга Н.Ганибал БНХАУ-аас Монгол Улсад суух Онц бөгөөд Бүрэн эрхт Элчин сайд Шэнь Миньжюань, БНХАУ-ын Гуандун мужийн орлогч дарга Ван Шэн тэргүүтэй төлөөлөгчдийг хүлээн авч уулзлаа.

Ардчилсан намын Ерөнхий нарийн бичгийн дарга Н.Ганибал тэргүүтэй албаныхан өнгөрөгч гуравдугаар сард БНХАУ-д албан айлчлал хийх үеэрээ Гуандун мужийн орлогч дарга Ван Шэн тэргүүтэй төлөөлөгчдийг Монголд урьсан. Эл урилгын дагуу өнөөдөр БНХАУ-ын Гуандун мужийн орлогч дарга Ван Шэн тэргүүтэй төлөөлөгчид Монгол Улсад хүрэлцэн ирж, албан уулзалт хийлээ.

Уулзалтад Монголын талаас Ардчилсан намын Ерөнхий нарийн бичгийн дарга Н.Ганибал, АН-ын Ерөнхий нарийн бичгийн даргын зөвлөх А.Адъяасүрэн, АН-ын Улс төрийн зөвлөлийн гишүүн П.Галиндэв, Ардчилсан намын Сургалт, судалгаа гадаад харилцаа хариуцсан газрын дарга Б.Батцэрэн, Ардчилсан намын Захиргаа удирдлагын газрын дарга Л.Баттүвшин нар байлцлаа. Харин БНХАУ-ын талаас БНХАУ-аас Монгол Улсад суух Онц бөгөөд Бүрэн эрхт Элчин сайд Шэнь Миньжюань, БНХАУ-ын Гуандун мужийн орлогч дарга Ван Шэн, Гуандун Рисинг Холдинг Групп ХХК-ийн группийн дарга Lyu Yongzhong, GAC Group /Guangzhou Automobile Group/ компанийн дэд ерөнхийлөгч Gao Rui тэргүүтэй төлөөлөгчид байлцав.
Ардчилсан намын зүгээс БНХАУ-ын хамгийн хүн ам ихтэй (117 сая гаруй хүн амтай) Гуандун мужийн бүс нутгийн туршлагыг судалж, орон нутгийн эдийн засгийн менежмент, инновацын экосистем, технологид суурилсан бодлогын харилцааг өргөжүүлэх нь шинэчлэлийн хөтөлбөрт нөлөө үзүүлнэ хэмээн үзэж байгаа юм.