Украины Ерөнхийлөгч Владимир Зеленский "АНУ Киевт шаардлагатай байсан 20 мянган пуужинг Ойрхи Дорнод руу шилжүүлсэн" гэж мэдэгджээ.

Тэрбээр "ABC News" телевизэд өгсөн ярилцлагадаа "Энэ нь АНУ-ын өмнөх ерөнхийлөгч Жо Байдентай тохиролцсон байсан асуудал юм" хэмээн онцолсон байна. Энэхүү ярилцлагыг зургадугаар сарын 8-ны Ням гарагт өгчээ.

Зеленскийн хэлснээр, уг пуужингууд нь тийм ч өндөр өртөгтэй байгаагүй боловч "тусгай технологи"-той бөгөөд энэ нь тэдгээрийг Shahed дроны халдлагын эсрэг ашиглах боломжтой аж.

Тэрбээр "Бид тэр 20 мянган пуужинд найдаж байсан. Өнөө өглөө миний Батлан хамгаалахын сайд АНУ тэдгээрийг Ойрхи Дорнод руу шилжүүлсэн гэж надад хэллээ" хэмээн дурдсан байна.

Үүнээс хэд хоногийн өмнө "The Wall Street Journal" сонин "Пентагон АНУ-ын Конгресст нууц байдлаар мэдээлэл өгсөн бөгөөд энэ нь Украиныг дроны дайралтаас хамгаалахад ашигладаг тусгай детонаторуудыг Ойрхи Дорнод дахь АНУ-ын Агаарын цэргийн хүчний нэгтгэлүүд рүү шилжүүлж байгааг харуулж байна" гэж мэдээлжээ.

Уг мэдээлэлд АНУ-д зэвсгийн хомсдол үүсээд байгаа болон Вашингтон тус бүс нутагт зөрчилдөөн даамжрах магадлалтай гэж үзэж, урьдчилан бэлтгэж буйг дурдсан байна.

Гэвч Трампын засаг захиргаа дээрх мэдээлэлд албан ёсоор хариу өгөөгүй байгаа ажээ.

Зеленский Трампыг "эрх чөлөөт дэлхийн удирдагч" болохыг уриалав

Украины Ерөнхийлөгч Владимир Зеленский Дональд Трамптай харилцаагаа “ердийн мэргэжлийн түвшинд” гэж тодорхойлсон бөгөөд хоёр орны удирдагчид “бараг харилцдаггүй” учир өөрөөр дүгнэх боломжгүй хэмээн мэдэгджээ.

Гэвч тэрбээр "Дөрөвдүгээр сарын 26-нд Ватиканд болсон 15 минутын ганцаарчилсан уулзалт “Цагаан ордны Зууван танхимд болсон уулзалтаас илүү өгөөжтэй” байсан" хэмээн онцолжээ. Энэ нь хоёрдугаар сарын сүүлчээр Зеленский, АНУ-ын Ерөнхийлөгч болон түүний орлогч Жэй Ди Вэнс нарын хооронд гарсан маргаантай холбоотой аж.

Түүнчлэн тус ярилцлагын үеэр Украины удирдагч дахин Трампыг ОХУ-ын эсрэг хориг арга хэмжээг чангатгахыг уриалжээ.

Зеленскийн хэлснээр, Киев өмнө нь АНУ-ын засаг захиргааны шаардлагыг хэд хэдэн удаа биелүүлж, гуравдугаар сард ямар ч урьдчилсан нөхцөлгүйгээр гал зогсоохоор, тавдугаар сард Москватай Стамбулд хэлэлцээр хийхээр зөвшөөрсөн аж. Харин Москва ямар ч нөхцөлгүйгээр дайныг зогсоох саналыг хүлээн зөвшөөрөөгүй гэж тэр тэмдэглэжээ.

Зеленскийн хэлснээр, Европын удирдагчид Трампыг “эрх чөлөөт дэлхийн удирдагч” хэмээн хардаг бөгөөд энэ нь “Европ АНУ шиг хүчтэй биш” гэдгийг ойлгосонтой холбоотой аж.

Эх сурвалж: DW
Б.ЖАРГАЛ