Гадаад харилцааны яамнаас мэдээлснээр, Элчин сайд, Байнгын төлөөлөгч Д.Гэрэлмаа тэргүүтэй төлөөлөгчид Женев хотноо энэ сарын 2-13-нд болж буй Олон улсын хөдөлмөрийн Бага хурлын 113 дугаар чуулганд оролцож байгаа ажээ.

Төлөөлөгчдийн тэргүүн чуулганы энэ сарын 5-ны өдрийн нэгдсэн хуралдаанд Монгол Улсад зохистой хөдөлмөр эрхлэлтийг дэмжих, хууль, эрх зүйн орчны шинэчлэл, хөдөлмөрийн аюулгүй байдал, эрүүл ахуйг сайжруулах чиглэлээр Засгийн газраас авч хэрэгжүүлж буй бодлого, үйл ажиллагааны талаар танилцуулж үг хэлсэн байна.

Тэрбээр "Монгол Улсын Засгийн газар Олон улсын хөдөлмөрийн байгууллага (ОУХБ)-тай хамтран хөдөлмөрийн хууль, эрх зүйн орчны цогц үнэлгээ хийж, хөдөлмөрийн хяналтын тогтолцоог бэхжүүлэх, хөдөлмөрийн аюулгүй байдал, эрүүл ахуйн хууль тогтоомжоо шинэчлэх, албадан хөдөлмөрийн бүх хэлбэрийг устгах асуудлыг анхаарч ажиллаж байна.

Үүний зэрэгцээ байгаль орчны тогтвортой байдал, зохистой хөдөлмөр эрхлэлтийг хослуулах замаар ногоон эдийн засагт шилжих шилжилтийг дэмжиж, сэргээгдэх эрчим хүчний салбарт хөрөнгө оруулалт хийж, ногоон ур чадварыг хөгжүүлэх хөтөлбөр хэрэгжүүлж байна" гэж танилцуулжээ.

Мөн нийгмийн хамгааллын хүртээмжийг сайжруулах, тэтгэмж олгох ажлыг цахимжуулах, тэтгэврийн тогтолцоог шинэчилж, нийгмийн даатгалын тогтолцоог илүү хүртээмжтэй, шуурхай болгох шинэчлэлийн алхмуудыг Монгол Улсын Засгийн газраас авч хэрэгжүүлж байгааг мэдээлж, нийгмийн гурван талт яриа хэлэлцээ нь хөдөлмөрийн бодлогын тулгын чулуу болохыг онцлон тэмдэглэсэн байна.

Э.ЭГШИГЛЭН