Монгол Улсын 34 дэх Ерөнхий сайдаар Г.Занданшатар томилогдоод хэдхэн хонож байна. Тэгвэл өнөөдөр тус Засгийн газрын бүрэлдэхүүнд хэн хэн багтах эсэх нь олны анхаарлын төвд байна.

Ерөнхий сайд Г.Занданшатарын хувьд өмнөх Засгийн газарт ажлаа сайн хийсэн, туршлагатай сайд нараа авч үлдэж, 2024-2028 оны Засгийн газрийн мөрийн хөтөлбөрт тусгагдсан мега төслүүдийг үргэлжлүүлнэ хэмээн мэдэгдсэн.

Шинээр засгийн газрын бүтэц, бүрэлдэхүүн тодорхой болж буй энэ цаг дор өмнөх Засгийн газарт ажиллаж байсан С.Амарсайхан, Б.Батцэцэг, С.Бямбацогт Б.Жавхлан, Г.Учрал, Ж.Энхбаяр нарыг салбараа мэддэг туршлагатай хэмээн үзэж улираахаар болжээ.

Тодруулбал, Б.Батцэцэгийг Монгол Улсын гадаад бодлогын залгамж халааг тэнцвэртэй авч явсан төдийгүй улс орнуудын дипломат харилцаанд онцгой хувь нэмэр оруулсан хэмээн үзэж байгаа аж.

Харин С.Амарсайханыг онцгой байдлын салбарын алба хаагчдын цалин хувцас хэрэгсэл техник хангамжийг нэмэгдүүлэх бодлогыг оновчтой хэрэгжүүлж, зөв арга барилаар ажилласан, Бүсчилсэн хөгжлийн бодлогын реформыг эхлүүлсэн хэмээн харж байгаа бол Ж.Энхбаярыг “Атрын VI” аяныг амжилттай эхлүүлсэн гэжээ.

Н.НЭРГҮЙ