Японы мэргэжлийн сумо бөхийн Их аварга Хакүхо аваргын нэрэмжит “Hakuho cup 2019” өсвөр үеийн сумо бөхийн олон улсын тэмцээн амжилттай болж өнгөрлөө. Найман орны 1224-н өсвөрийн сумочид долоон насны ангилалд өрсөлдөж алт, мөнгө, хүрэл медалийн эзэд тодорлоо. Манай баг тамирчид багийн барилдаанд 154 багаас “А” баг хүрэл медаль, “B” баг шигшээ 8-д шалгаран үлдлээ.

Мөн “Кибо” дэвжээний баг тамирчид анх удаа багын болон хувийн барилдаанд оролцсон байна. Хувийн барилдаанд 10 насны ангилалд 159 хүүхэд өрсөлдсөнөөс н.Баднаанямбуу долоо ялж алтан медаль, 13-15 буюу ахлах насны ангилалд 367 хүүхэд өрсөлдсөнөөс н.Сосорхүү 6 ялж шигшээ 16-д шалгаран үлдлээ. 9 насанд барилдсан Доржцэрэн Тусгай 3 шагналын нэг Кантошо буюу Дайчин бөхийн шагнал хүртжээ.