Сүүлийн хэдэн өдөр олон нийтийн анхаарлыг татсан чухал сэдэв бол бродюр байлаа. Шив шинэ шахуу, бүр зарим нь суулгаад нэг жил гаруйхан болж байгаа бродюрыг автозамын стандарт өөрчлөгдсөн гэх шалтгаанаар сольж буйг иргэдийн дийлэнхи нь эсэргүүцэж байгаа. Тэгвэл өчигдөр Монголын авто замчдын холбоо, Замчин залуучуудын холбооны төлөөллүүд гэж өөрсдийгөө нэрлэсэн хэсэг иргэд мэдээлэл хийв. Амьхандаа төрийн байгууллага биш мэргэжлийнхэн мэдээлэл хийж, бродюр сольж буй нь зөв гэх маягийн юм ярьж, иргэдийн санаа бодолд нөлөөлөх зорилготой ирсэн гэх.

Гэвч "ухаангүй ноёнд урагшгүй албат" гэгчээр тэдний хэвлэлийн хурал бүхэлдээ бүтэлгүйтсэн юм. "Монгол хүн дээл хийж өмсөхдөө эмжээрээ сольдог шиг бродюроо солих нь зөв" гэсэн авто замчдын яриа сошиал медиад олон нийтийн элэг доог л болж байна.

Үүнийг ч анзаарсан мэт Нийслэлийн Засаг Дарга бөгөөд Улаанбаатар хотын захирагч, Нийслэлийн МАН-ын хорооны дарга Х.Нямбаатар өнөө өглөө авто зам шинэчлэлийн ажлыг зогсоож, хуулийн байгууллагад шалгуулах эсэх талаар санал асуулга явуулахаар болсноо зарлав.Тэрээр авто зам засварын төсөв болон бродюрын төсөв нь зах зээлийн үнэ ханшид нийцэж буй эсэх мөн худалдан авах ажиллагааг хуулийн хүрээнд хийсэн эсэх асуудлыг Үндэсний аудитын газар, Авлигатай тэмцэх газарт шалгуулж, нэгдсэн дүгнэлт гарах хүртэл одоо хийж байгаа болон цаашид хийх авто зам засвар, шинэчлэлийн ажлуудыг зогсоох санаатай байгаа бололтой.

Өөрөөр хэлбэл өөр лүү нь хамгийн их ирж байгаа шүүмжлэлийг намжаахын тулд Х.Нямбаатар бродюрны мафитай тэмцэгч ч болж магадгүй нь бололтой.

Үүнтэй зэрэгцэн УИХ-ын дарга асан З.Энхболд нэгэн ноцтой зүйлийг ярив. Тодруулбал тэрээр өнөөдөр Өвөрхангай аймгаас хийсэн лайвынхаа үеэр: "МАН-ынхан 23 мянган төгрөгний бродюрыг яаж 130 мянган төгрөгөөр шахаж байгааг харчих. Гарсан зөрүү мөнгөнөөс нь сонгогчдод авилга болгож өгнө. Сонгогчдод тарааж буй, тараах гэж буй их хэмжээний мөнгө бол МАН-ынхны мөнгө биш бродюрны зөрүү мөнгө шүү" гэсэн юм.

С.Сарнай

ЭХ СУРВАЛЖ: SONIN.MN