УИХ-ын чуулганы нэгдсэн хуралдаанаар "Монгол Улсын Ерөнхий сайдад итгэл хүлээлгэх тухай” УИХ-ын тогтоолын төслийг хэлэлцэж, нууц санал хураалтыг цаасаар явуулахад хуралдаанд оролцсон 82 гишүүний 44 нь буюу 53.6 хувь нь тогтоолын төслийг дэмжиж, 38 гишүүн зөвшөөрөхгүй гэсэн санал өгчээ.

УИХ-ын дэгийн тухай хуульд нийт гишүүдийн олонх буюу 64 гишүүн дэмжсэнээр Ерөнхий сайд Л.Оюун-Эрдэнэ итгэл үзүүлэх байв. Нийт 44 гишүүн дэмжсэн учраас Ерөнхий сайд Л.Оюун-Эрдэнийг огцорсонд тооцсон. Ийнхүү Л.Оюун-Эрдэнийн тэргүүлсэн хамтарсан Засгийн газар 10 сар ажиллаад огцорлоо.

УИХ-ын чуулганы нэгдсэн хуралдаан дээр хэлэлцэж буй асуудалтай холбогдуулан гишүүд асуулт асууж, хариулт авч, үг хэлсний дараа Ерөнхий сайд Л.Оюун-Эрдэнэ үг хэлэв.

Тэрбээр “Хамтарсан Засгийн газар цаашдаа байгуулагдана. 126 гишүүнтэй парламентын тогтолцоог сонгож авсан нь өөрөө суурь асуудал. Тиймээс өнөөдөр бид бас нэг сургамж дүгнэлтийг хамтдаа хийж байна.

Хамтарсан Засгийн газар улс орны хөгжлийг урагшлуулах хамгийн чухал шийдэл гэж би үздэг. Энэ үзэл бодолдоо үнэнч үлдэхийг хүссэн. Сонгодог парламентын засаглалыг хэрхэн төгөлдөржүүлэхийг тойрч ярилаа.

1991 оны арваннэгдүнгээр сарын 30-нд Ардын их хурлын дептатудын 186 нь парламент, 186 нь Ерөнхийлөгчийн засаглалыг дэмжиж санал тэнцэж байсан. Энэ үед Ерөнхийлөгч П.Очирбат байр сууриа илэрхийлж парламентын засаглалаа авч үлдэж байсан түүхтэй.

Өнөөдрийн итгэл үзүүлэх асуудал энэ агуулга дээр сонгодог парламентын засаглалыг төгөлдөржүүлэхэд дэмжлэг хэрэгтэй байна гэсэн нь хагас Ерөнхийлөгч, хагас парламентын засаглалыг цэгцэлж байж олон зүйл ойлгомжтой болно. Үүнийг Ерөнхий сайд бүхэн мэддэг. Харин нээлттэй ярьж чаддаггүй сэдэв.

Ерөнхийлөгч ч байр сууриа илэрхийлж байгаа нь парламентын хэлэлцүүлгийн түүхэн протокол болж үлдэнэ гэдэгт итгэлтэй байна. Цаашлаад орлогоо нотлох, хууль бус хөрөнгө, авлигатай холбоотой асуудал дээр манлайлж ажиллана.

Миний хувьд олон нийтэд эргэлзээ төрүүлсэн асуудалд нэр холбогдсондоо гишүүдээсээ уучлал хүсье. Энэ асуудал хууль хяналтын байгууллагаар шалгагдаад нотлогдоно гэдэгт эргэлзэхгүй байна” гэв.

Мөн тэрбээр цар тахал, дайн, тариф зэрэг олон улсын ээдрээтэй үед ард түмэндээ зүтгэсэн нь нэр төрийн хэрэг байсныг дурдан, өнөөдөр ордонд хүч мөхөстөж байгаа ч олон нийтийн хүсэл эрмэлзэл огт өөр гэдгийг онцолж, “Аалзны тор мэт сүлжилдсэн ашиг сонирхлын сүлжээ ард түмнийг дийлнэ гэж үгүй” гэж хэллээ.

Үндсэн хуульд заасны дагуу УИХ дараагийн шинэ Ерөнхий сайдыг 30 хоногт багтаан томилж, тэр хүртэл Л.Оюун-Эрдэнэ Монгол Улсын Ерөнхий сайдын үүрэг гүйцэтгэгчээр ажиллах юм.

Б.ЖАРГАЛ