Японы мэргэжлийн сумогийн 69 дэх их аварга, Монгол Улсын Хөдөлмөрийн баатар, гавьяат тамирчин М.Даваажаргал мэргэжлийн сүмогийн түүхэнд хамгийн олон удаа буюу 45 удаа түрүүлсэн ёкозүна. Арлын оронд түүний талаар олон янзын мэдээлэл хөвөрсөөр байгаа талаар “Kyodo news” мэдээлжээ.

Хакүхогийн шавь, дээд зиндааны бөх асан Хокүсэйхо А.Даваанинж 2024 оны хоёрдугаар сард бөхчүүдэд бие махбодын хүч хэрэглэж, дарамталж, дээрэлхсэн хэрэгт холбогдон, сүмогоос хөөгдсөн. Түүгээр ч зогсохгүй дэвжээг хаахад хүргэж, дэвжээний бөхчүүдийг өнгөрсөн жилийн дөрөвдүгээр сард Исэгахама дэвжээ рүү шилжүүлж, Хакүхогийн оякатагийн эрэмбийг ч буулгасан билээ.

Түүнээс хойш бүтэн жил өнгөрч байгаа ч Япон мэргэжлийн сүмогийн холбооны Удирдах зөвлөл тус дэвжээг эргэж нээх эсэх талаар огт ярилцаагүй хэвээр байна.

Эх сурвалжлийн мэдээлснээр, тус холбоо энэ асуудлыг өнөөдөр буюу зургадугаар сарын 2-ны өдөр хэлэлцэхээр товложээ. Хурлаас ямар шийдвэр гарахаас Хакүхогийн цаашдын шийдвэр хамаарах учир энэ сарын 9-нд хэвлэлийн бага хурал хийлгэхээр төлөвлөсөн бололтой.

“Kyodo news”-т Хакүхогийн ойрын эх сурвалж “Хакухо Даваажаргал Японы мэргэжлийн сүмогийн холбооноос гарах шийдвэр гаргаж байна” гэж өнгөрсөн баасан гаригт мэдээлсэн ч их аварга энэ талаар ам нээгээгүй хэвээр байна.

Хакүхо М.Даваажаргал зургадугаар сарын 3-нд аав, дархан аварга Жигжидийн Мөнхбатын хөшөөг нээх ёслолд оролцохоор Улаанбаатарт ирээд буй бөгөөд удалгүй Япон руу буцаж, хэвлэлийн хурал хийлгэх бололтой.

Тэрбээр дэвжээг нь нээнэ гэж итгэж найдаж буйгаа хэд хэдэн удаа илэрхийлсэн. Өөрөөр хэлбэл “Сүмочид гэдэг онцгой хүмүүс. Шийдвэрийг маргааш гэнэт гаргалаа гэхэд би шууд ажиллаад эхэлчихэж чадахгүй. Тиймээс урьдчилан мэдэж байж ажлаа эхлэхгүй болохгүй” гэж ярьж байв.

Японы хэвлэлүүд “Дэвжээний асуудлыг нь ярилцана гэж бүтэн жил гаруй хүлээсэн учир одоо тэвчээр нь барагдаж байж болох талтай” гэж мэдээлжээ. Хэрвээ дэвжээг нь нээхгүй бол Хакүхо Японы мэргэжлийн сүмогийн холбооноос гарах шийдвэр гаргах магадлал тун өндөр гэж ажиглагчид үзэж байгаа ажээ.

Эх сурвалж “Японы сүмогийн холбооны Удирдах зөвлөл Миягино дэвжээг дахин нээх боломжгүй гэж үзэж байгаа учраас асуудлыг шийдэлгүй сунжруулж, өдийг хүргэсэн” гэж мэдээлсэн байна.

Болгарын эрдэмтэн, соёл судлаач Георги Гочев (Georgi Gochev) “Японы сүмогийн холбооны Хакүхо руу чиглэсэн өшөө хонзон: Сүмо бөхийн нэр төрийг гутаах явдал” нэртэй нийтлэл бичжээ.

Тэрбээрнийтлэлдээ “Хүмүүсийн анхаарлыг татаж байгаа нэг зүйл улам бүр тодорхой болсоор байна: Японы сүмогийн холбоо зөвхөн Хакүхогийн амыг хамхихыг зориод зогсохгүй түүнийг бүрмөсөн зайлуулахыг хүсэж байна.

Хакүхо бол түүхэнд хамгийн олон даваа авсан зүгээр нэг ёкозүна биш юм. Тэр олон сая шүтэн бишрэгчтэй, гайхалтай бөх. Тэр өөрийн бодлоо чөлөөтэй илэрхийлэх, бөхчүүдээ өөрийнхөөрөө бэлтгэх, хатуу дэг журамтай системийг өөрчлөх мөрөөдөлтэй болохоор л түүнийг зайлуулахыг зорьж байна.

Японы сүмогийн холбоо тэр агуу хүнийг хэрхэн тогтоохоо мэдэхгүй байна. Түүнийг дээд амжилтууд эвдэж байх үед нь тэвчсэн ч одоо дэвжээний ахлагч болсон учир хамгийн том аюул гэж үзэж байна.

Түүний алхам бүр, үг, үйлдэл бүрийг хянаж, шүүмжилж байна. Яагаад? Тэр япон хүн биш учраас уу? Учир нь тэр тус холбооныхныг аялдан дагадаггүй учраас уу? Учир нь түүн шиг хэн ч хуучин тогтолцоог зориглон сөрж байгаагүй учраас уу?

Үнэнийг хэлэхэд, хэрвээ тэр япон гаралтай ёкозүна байсан бол ийм хатуу хяналтад орохгүй байсан нь лавтай. Хакүхог түүний амжилт, бие даасан байдал, өөрийн онцлогийнх нь төлөө шийтгэж байна. Энэ бол сахилга журам биш, харин “хар шуурга” салхилж байна.

Японы сүмогийн холбооны үйлдлүүд сүмо бөхийн нэр төрийг хамгаалах бус, харин эсэргүүцлийг дарж, улам гишгэлж, хуучин дэг журмыг хадгалахын төлөө юм.

Хэрвээ Японы сүмогийн холбоо Хакүхог зайлууллаа гэхэд энэ нь уламжлалын ялалт болохгүй. Харин ч сүмо бөхийн ирээдүйн хувьд эмгэнэл болно. Учир нь, Хакүхо нь хувьсал, хөгжлийн бэлгэ тэмдэг юм.

Тэр ирээдүйн бөхчүүдээ сахилга бат, шинэ санаа, алсын хараатайгаар бэлтгэж байна. Тэр сүмог хайрлаж, хэрхэн хөгжүүлэхийг тод харуулж буй.

Би Хакүхогийн талд байна. Би агуу хүний талд байна. Бас бидний хайртай спортын амин сүнсийг сүйтгэх аюултай хорон улс төрийн эсрэг зогсоно” хэмээн бичжээ.

Б.ЖАРГАЛ