УИХ-ын Төрийн байгуулалтын байнгын хороо Монгол Улсын Ерөнхий сайд Л.Оюун-Эрдэнэд итгэл хүлээлгэх эсэх асуудлыг хэлэлцэж байна. Байнгын хорооны хуралдаанд оролцож буй гишүүдийн 11 нь асуулт асуухаар нэрээ өгсөн. Хэлэлцэж буй асуудалтай холбогдуулан хуралдаанд оролцож буй гишүүд асуулт асууж, хариулт авч байна.

Ерөнхий сайд Л.Оюун-Эрдэнэ гишүүдийн асуултад хариулахдаа "Та бүхэн бүгдээрээ л ажигласан байх. Тавдугаар сарын 14-нд Гашуунсухайт-Ганцмод хил холболтын төмөр замын бүтээн байгуулалтын ажил эхэлсэн.

Тэр үетэй давхцаад энэ мэдээлэл цацагдсан. Хүрч ирсэн өдрөө л бүх материалаа бүрдүүлээд, Авлигатай тэмцэх газарт өгсөн. Бид бүгдээрээ л хөрөнгө, орлогын мэдүүлгээ өгдөг. Хүүтэйгээ уулзсан, юу болов гээд асуусан. Манай хүү АТГ-т очиж тайлбар өгсөн. Хүү маань 23 настай.

Уулзаад ярихад нэгэн бүсгүйд хайр сэтгэлтэй болсон нь үнэн байна. Бие давхар болоод бөгж бэлэглэсэн. Бөгж нь 17 сая төгрөгийн үнэтэй, бугуйвч нь 500 мянган төгрөгийн үнэтэй.

Тэр нэг том үнэтэй машины талаар судалж үзсэн, Монголд 10 хүрэхгүй л байдаг юм билээ. Тэр бол худлаа мэдээлэл. Миний хөрөнгө, орлогын мэдүүлэг АТГ-ын цахим мэдээлэлд бий.

Хугацааны хувьд хөрөнгө, орлогын мэдүүлэгтэй нягтлаад, буцаагаад хариу өгөхөд хоног нь 30-60 хоног. УИХ дээр яригдах асуудал дээр хэвлэл мэдээлэлд хөндлөнгөөс тайлбарлах нь зохимжгүй юм шиг санагдсан.

Хүүтэйгээ уулзаж, цаг гаргаж чадаагүй нь миний хувьд аав хүний алдаа. 23 настай гэдэг залуу бол бие даасан эрх зүйн чадамжтай иргэн. Би 23 настай байхдаа Дэлхийн зөн олон улсын байгууллагад салбар удирдаад явж байсан. Тэр хүн хэнд хайр сэтгэлтэй болох, яаж амьдралаа зохиоход нь хөндлөнгөөс оролцоод байх нь зохисгүй.

Зөв амьдраасай, янз бүрийн юманд холбогдчихолгүй байгаасай гэдэг үгийг хоёр хүүдээ хоёуланд нь хэлдэг. Олон нийтийн өмнө гаргахгүй явж байгаад нэрмээс болгочихою уу гэдэг бодол бий. Олон нийтийн шаардлага зөв.

Миний хөрөнгө орлогын мэдүүлэг ойлгомжтой. Хүлэг контент, Херо энтертэйнментын 50 хувь байдаг. 2017 оноос хойш тогтвортой байгаа.

Манай хүүгийн хувьд багаасаа л зураг авах сонирхолтой, та нар ч зарим нь мэднэ. Сонирхлынхоо дагуу контент хийх дуртай хүүхэд. Манай аав зураач, надад бол зургийн авъяас байхгүй, манай хүү зургийн авьяастай. Тэрнийхээ дагуу энд тэнд контент хийгээд явдаг залуу. Цаашдаа энэ ажлаа хийгээд явах байх.

Хугацаандаа энэ бүх зүйл нотлогдоно гэдэгт итгэлтэй байна. Хэрвээ би өөрийнхөө хөрөнгө орлогод эргэлзэж байсан бол галтай олон асуудал руу орохгүй байсан. Хэрвээ энэ жагсаал зөвхөн орлогоо нотлох зүйл байсан бол шууд гараад уулзах байсан.

Сонгодог парламентын засаглал гэдэг агуулгыг бүгдээрээ л мэдэж байгаа. Монгол Улс парламентын засаглалтай, төлөөллөө илүү том болгосон. Энэ юу гэсэн үг вэ гэхээр парламент өөрөө бие даан шийдвэр гаргадаг байх эрхийг л баталгаажуулж байгаа.

76-126 болсноор, олон эксперт орж ирснээрээ санал гээгдэхгүй жагсаалтыг төлөөлж байгаа гишүүд томсгосон тойргоос өндөр чансаатай сонгогдож буй гишүүд, бүгдээрээ Монголын ард түмнийг төлөөлж байгаа.

Ард түмнийг төлөөлж байгаа элчийн хувьд энэ шийдвэрээ бидний хувьд гаргах нь зүйтэй. Энэ ч агуулгаараа сонгодог парламентад байдаг нийтлэг жишгийг хэвшүүлэх гэж энэ итгэл хүлээлгэх эсэх тухай асуудлыг оруулж ирж байна.

Дэлгэрэнгүй детальчилсан асуулт асуувал хариулахад бэлэн байна. Энэ бүх мэтгэлцээн сонгодог парламентын соёл. Парламент өөрөө Засгийн газраа бүрдүүлж огцруулдаг байх нь өрөө Үндсэн хуулийн зарчим. Үүнд хэн ч ямар нэгэн байдлаар нөлөөлөхгүй байх учиртай.

Энэ бол ард түмэнд олгогдсон парламентын онцгой бүрэн эрхийн асуудал. Тийм учраас парламент олон талаас шүүн хэлэлцээд, олон нийт ард иргэдийн эргэлзээ болон асуудлыг тайлах ёстой. Энэ агуулгаар оруулж ирсэн" гэв.

Б.ЖАРГАЛ